Рим папаси Лев XIV бутун дунё бўйлаб можаролар кучайиб бораётгани, глобал институтлар суиистеъмоллик ва ҳарбий жиноятларга тўлиб кетганидан афсусда эканини билдирди. У халқаро ҳуқуқ ҳозирда “шармандали” ҳолатда эканини таъкидлади.
“Бугунги кунда халқаро ва гуманитар ҳуқуқнинг кучи жуда заифлашиб қолган. Унинг ўрнини бошқаларни енгиш истаги эгаллаганини кўриш жуда ачинарли. Бу инсоният учун ҳам, давлат етакчилари учун ҳам номуносиб ва шармандаликдир”, деди понтифик ижтимоий тармоқдаги постида.
Папа ўз сўзларига изоҳ бермаган. Бироқ унинг бу гаплари Исроилнинг Ғазодаги “геноцид”ини тўхтатишга чақирувлар кучайиб бораётган бир пайтда айтилган. Исроил халқаро ҳамжамият томонидан халқаро гуманитар ҳуқуқни бузганликда бир неча бор айбланган.
Исроил ҳарбийлари Ғазонинг катта қисмини яксон қилган. Унинг деярли барча аҳолиси кўчирилган ва ҳудудда камида 56 156 киши ҳалок бўлган.
Июнь ойи бошида АҚШ Давлат департаментининг собиқ вакили Метю Миллер Исроил Ғазода “шубҳасиз” ҳарбий жиноятлар содир этганини тан олган эди. Исроил Халқаро жиноий суд томонидан Ғазо блокадаси ва қотилликлар ҳақидаги резолюцияларга қарши чиққан.
Халқаро суд 2024 йили Исроилнинг Фаластин ҳудуди — Шарқий Қуддус, Ғарбий Соҳил ва Ғазони босиб олишини ноқонуний деб топиб, урушни имкон қадар тезроқ тугатишга чақирганди. Ушбу суд Исроил бош вазири Биньямин Нетаньяху ва собиқ мудофаа вазири Йоав Галлантни Ғазодаги ҳарбий жиноятлар, жумладан, уруш қуроли сифатида очарчиликдан фойдалангани учун ҳибсга олишга ордер берган.
Май ойида, марҳум Рим папаси Франциск ўрнини эгаллаган биринчи америкалик понтифик — Папа Лео XIV – Ғазога қарши урушни тўхтатишга чақирган эди.
“Ҳозироқ ўт очишни тўхтатинг. Ғазо секторидан ўз фарзандларининг жонсиз жасадларини қучоқлаб, озиқ-овқат ва сувга зор бўлиб, бомбардимонлардан бошпана излаб тинимсиз кўчишга мажбур бўлган оналар ва оталарнинг фарёдлари эшитилмоқда”, деган эди Папа.
Изоҳ (0)