Таиланд ҳукумати каннабис (наша) учун жиноий жавобгарликни қайта жорий этишни кўзламоқда. Бу 2022 йилдан буён ривожланиб келаётган ва қиймати 1 миллиард доллардан ошган саноат учун катта таҳдид ҳисобланади. Бу ҳақда Reuters хабар берди.
Каннабисни қонунийлаштириш тарафдори бўлган “Бхумжайтай” партияси ҳукмрон коалициядан чиққач, ҳукумат ушбу соҳани кучлироқ назоратга олишга ҳаракат қила бошлади. 24 июнь куни Соғлиқни сақлаш вазирлиги каннабисдан рекреацион (дам олиш) мақсадида фойдаланишни тақиқлаб, уни чакана харид қилиш учун шифокор рецептини мажбурий қилди.
Келажакда каннабис гиёҳванд модда сифатида таснифланади, деди соғлиқни сақлаш вазири Сомсак Тепсутин.
Таиланд 2022 йилда Осиёда биринчилардан бўлиб каннабисни декриминаллаштирганди. Бироқ бу соҳани тартибга солувчи аниқ ва қатъий қоидалар жорий қилинмаган. Ўшандан бери Таиланд бўйлаб ўн минглаб дўконлар ва каннабис савдоси билан шуғулланувчи корхоналар пайдо бўлган.
Уларнинг аксарияти сайёҳлик зоналарида жойлашган. Таиланд Савдо палатаси ҳисоб-китобига кўра, 2025 йилгача ушбу саноат, дори-дармон маҳсулотларини ҳам қамраб олган ҳолда, 1,2 миллиард долларга етиши мумкин.
Сайёҳлар Таиландда каннабис истеъмол қилиш мумкинми?
Рухсат этилган: 20 ёшдан катта фуқаролар учун уй шароитида марихуана (каннабис) истеъмол қилишга рухсат бор. Шунингдек, лицензияга эга ресторанларда каннабис қўшилган маҳсулотлар истеъмоли ҳам мумкин. Таиланд Соғлиқни сақлаш вазирлиги марихуана истеъмол қилгандан кейин рулга ўтирмасликни тавсия қилган.
Тақиқланган: Жамоат жойларида — мактаблар, савдо марказлари ва бошқа очиқ жойларда марихуана чекишга рухсат йўқ. Қоидабузарлар 25 минг бат (650 евро) жаримага ёки 3 ойгача қамоқ жазосига тортилиши мумкин. Сайёҳлар учун каннабис ва унинг уруғларини мамлакатга олиб кириш ёки олиб чиқиш қатъиян ман этилган.
2018 йил охирида Таиланд ҳукумати фуқароларга тиббий мақсадларда каннабис истеъмол қилишга рухсат берган. 2019 йилдан эса ушбу қонун сайёҳларга ҳам татбиқ этила бошланган.
Изоҳ (0)