Тошкентда бир тоннадан ортиқ гиёҳвандлик воситалари ёқиб юборилди (фото ва видео)

24 август куни Тошкент шаҳридаги заводларнинг бирида жами 1 тонна 350  килограммга яқин гиёҳвандлик воситалари йўқ қилинди. Бу ҳақда «Дарё» мухбири хабар берди.

Тадбир 26 июнь – Халқаро гиёҳвандликка ва гиёҳвандлик воситаларининг ноқонуний айланишига қарши кураш куни муносабати билан ДХХ томонидан ҳуқуқни муҳофаза қилиш органлари томонидан ноқонуний муомаладан олинган гиёҳвандлик воситаларини йўқ қилиш чоралари доирасида ташкил этилган. Ташкилотчилар тадбир олдидан ташкил этилган матбуот анжуманида заводдаги таъмирлаш ишлари туфайли мазкур жараён август ойида ташкил этилаётганини маълум қилишди.

Маълумотга кўра, Ўзбекистондаги нарковазиятга салбий таъсир кўрсатаётган асосий омил - қўшни Афғонистоннинг ҳанузгача гиёҳвандлик воситаларини кўп миқдорда етиштириши, дунёнинг турли минтақаларига Ўзбекистон ҳудуди орқали экспорт қилинишидир. Таҳлилларга кўра, бу ерда ўтган йилда 224 минг гектар майдонларда 6,3 минг тонна опий етиштирилган.

Вазирлар Маҳкамаси ҳузуридаги Наркотик моддаларни назорат қилиш миллий ахборот-таҳлил маркази маълумотларига кўра, Ўзбекистонда 2020 йилда гиёҳвандлик воситаларининг ноқонуний айланиши билан боғлиқ 6032 та жиноят фош этилган. Натижада, 1 тонна 542,6 кг наркотик моддалар мусодара қилинган. Бу ўтган йилга нисбатан 28,5 фоизга кўпайган. 2020 йилда 28,4 кг героин, 124,1 кг опий, 127,3 кг гашиш мойи, 323,9 кг кўкнор, 692,8 кг марихуана, 223,9 кг гашиш, 692,8 кг марихуана, 279,4 г кокаин, 1229,7 г синтетик наркотик моддалар, 446,98 г бошқа наркотик моддалар ушлаб қолинган.

Фош этилган жиноятлардан 1814 таси наркотикларни ўтказиш-сотиш, 304 таси — контрабанда, 1521 таси — гиёҳвандлик ўсимликларини етиштириш, 49 таси — бангихоналар ташкил этиш ва 2344 таси — бошқа жиноятлардан иборат.

2020 йилда гиёҳванд моддаларнинг ноқонуний айланмаси билан боғлиқ 53 та ҳолатларда жиноятларни содир этгани учун 55 нафар чет эл фуқароси (Афғонистон (23), Тожикистон (9), Россия (6), Молдова (2), Қозоғистон (9), Қирғизистон (6)) қўлга олинди. Улардан 303,2 килограмм гиёҳванд моддалар олиб қўйилган.

«Қора дори – 2020» тадбири давомида жами 973 ҳолатда 5737 квадрат метр майдонда таркибида наркотик моддалар бўлган ўсимликлар, шу жумладан, 3251 квадрат метр – кўкнор, 2486 квадрат метр – наша экинлари экилганлиги аниқланган. Ўзбекистонда гиёҳванд моддаларни назорат қилиш соҳасидаги халқаро ҳамкорликни кенгайтириш ишлари давом эттирилиши таъкидланди.

Эслатиб ўтамиз, 2020 йилда худди шундай тадбирда 626 килограмм 981 грамм гиёҳвандлик воситалари ёқиб юборилган.

Бундан аввал бухоролик ҳайдовчи кўп миқдордаги гиёҳванд модда билан қўлга олингани, Фарғонада Тожикистондан қарийб 2 кг гашиш олиб ўтган шахс ва унинг шериги ДХХ ходимлари томонидан ушлангани ҳамда Фарғонада олма боғида каннабис етиштирган фуқаро аниқлангани ҳақида хабар берилганди.