Германия ҳукумати марихуанани қисман қонунийлаштириш тўғрисидаги қонун лойиҳасини маъқуллади, деб хабар бермоқда ҳукумат матбуот хизмати. Энди ҳужжат парламентда кўриб чиқилиши керак.
Қонун лойиҳаси 18 ёшдан ошганларга шахсий мақсадда фойдаланиш учун уч тупгача наша ўсимлигини етиштиришга рухсат беради. 25 граммгача миқдорда наша сақлаганлар энди жиноий жавобгарликка тортилмайди.
Бундан ташқари, ҳужжатда каннабис етиштириб, ўз аъзоларини ушбу маҳсулот билан таъминлайдиган уюшмалар ташкил этилиши кўзда тутилган. Уюшмалар аъзоси 500 дан ошиб кетмаслиги керак, улар клубдан ойига 50 граммгача наша олади. Уюшманинг 21 ёшгача бўлган аъзолари наша маҳсулотларидаги ТГК (наша баргларида бўладиган психоактив модда) миқдори 10 фоиздан ошмаслиги шарти билан фақат 30 грамм каннабис олиши мумкин бўлади.
Уюшма аъзоларига клублар ҳудудида ва улардан 200 метр масофада наша ишлатиш тақиқланади. Клубларнинг ўзи мактаб ва боғчалардан камида 200 метр узоқликда бўлиши керак, деб ёзади Deutsche Welle.
Нашрнинг аниқлик киритишича, қонун лойиҳаси биринчи навбатда марихуана атрофидаги жиноятларни қисқартиришга қаратилган. Кейинги қадам — қонунийлаштириш бўлади. Шундан сўнг ихтисослаштирилган дўконлар таркибида наша ва ТГК бўлган маҳсулотларни сотиши мумкин, аммо фақат маълум ҳудудлар ва шаҳарларда.
2021 йилда Германияда Германия Социал-демократик партияси, Яшиллар ва либерал Эркин демократик партиядан иборат ҳукумат коалицияси тузилганди. Коалицияга ўша пайтда молия вазири бўлган канцлер Олаф Шольц бошчилик қилди. Томонларнинг коалиция келишувида, бошқа нарсалар қатори, Германияда каннабисдан кўнгилочар мақсадларда фойдаланишга рухсат берилиши назарда тутилган эди.
Изоҳ (0)