“Толибон” ҳаракати раҳбари мулла Ҳайбатулла Охундзода Афғонистонда марихуана етиштиришни тақиқлади. Бу ҳақда Hasht-e Subh Daily хабар берди.
“Толибон” раҳбари фармонида мамлакат бўйлаб наша етиштириш тақиқлангани қайд этилган.
“Бутун мамлакатда наша етиштириш мутлақо тақиқланган, ҳеч ким ўз ерига наша эка олмайди, агар улар ўз ерларига наша экса, экин йўқ қилинади”, — дейди Охундзода.
Ушбу фармонда мулла Ҳайбатулла “Толибон”нинг Ички ишлар вазирлиги ва ушбу гуруҳнинг бошқа тергов бўлимларига қонунга бўйсунмаганларни судга тақдим этишни буюрган. “Толибон”нинг суд муассасаларига ҳам қонунбузарларни шариат асосида жазолаш буюрилган.
Мулла Ҳайбатулланинг Афғонистоннинг жанубий вилоятларида кўкнори етиштириш ва гиёҳванд моддалар савдосини тақиқлаш тўғрисидаги фармойишлари самарасиз экани айтилмоқда. Мазкур вилоятлардаги бозорда опиум сотилиши ва харид қилиниши келтирилган.
Афғонистон дунёдаги энг йирик афюн ва каннабис етиштирувчи давлатлардан биридир. Мамлакатда наша ишлаб чиқариш ҳажми тўғрисида ишончли маълумотлар мавжуд эмас. БМТ экспертларининг ҳисоб-китобларига кўра, 2009 йилда Афғонистонда наша етиштириш учун мамлакатнинг 17 вилоятида 10 мингдан 24 минг гектаргача майдонлар ажратилган.
Изоҳ (0)