Самарқанд вилоятининг Самарқанд туманида 670 туп каннабис етиштирган шахс қўлга олинди. Бу ҳақда вилоят ИИБ хабар берди.
Маълум қилинишича, 1 август куни туманнинг “Янги ариқ” маҳалласида ўтказилган тезкор тадбир давомида 1976 йилда туғилган эркак далаҳовлисида 670 туп каннабис гиёҳвандлик ўсимлигини парваришлаб келаётгани аниқланган. Шунингдек, ҳодиса жойида сақлаб келинган 15 килограмм 300 грамм марихуана гиёҳвандлик воситаси ашёвий далил сифатида олинган.
Тезкор тадбир ўтказилаётганда далаҳовлида бўлган уч нафар шахснинг ҳолатга алоқадорлиги бўйича текширувлар амалга оширилмоқда.
Мазкур воқеа юзасидан вилоят ИИБ ҳузуридаги тергов бошқармаси томонидан Жиноят кодексининг 270-моддаси (тақиқланган экинларни етиштириш) 2-қисми “б” банди ва 273-модда (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 5-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)