“Толибон” опиум савдосидан олинадиган солиқни бекор қилди. Наркотик модда учун қанча солиқ тўланган?
“Толибон” ҳаракати Афғонистоннинг Нимрўз вилоятида опиумдан олинадиган солиқни 10 ойга бекор қилиб, бу муддатда контрабандачиларга афюнни мамлакатдан олиб чиқишни буюрди. Бу ҳақда Hasht-e Subh Daily хабар берди.
Маҳаллий манбага кўра, “Толибон” контрабандачиларга афюнини сотиш ва Афғонистондан олиб чиқиш учун 10 ой муҳлат берган. Бундан ташқари, “Толибон” наркотик сотувчиларни солиқ ва божхона тўловларидан озод қилган.
“10 ойдан сўнг гиёҳванд моддалар савдосини бутунлай тақиқланиши ёки тақиқланмаслиги бўйича маълум қарор чиқарилади”, — дейилади хабарда.
“Толибон” Афғонистонда ҳокимиятни қўлга киритгач, кунига бир килограмм афюн учун 600 афғони (78 540 сўм) солиқ ундиргани ва афюнни ушбу вилоят чегаралари орқали мамлакатдан олиб чиқиб кетишга рухсат бергани маълум қилинди.
Ўз навбатида, “Толибон” ҳаракати раҳбари мулла Ҳайбатулла Охундзода Афғонистонда марихуана етиштиришни тақиқлаган.
“Бутун мамлакатда наша етиштириш мутлақо тақиқланган, ҳеч ким ўз ерига наша эка олмайди. Агар улар ўз ерларига наша экса, экин йўқ қилинади”, — деган Охундзода.
Қонунни бузганлар шариат асосида жавобгарликка тортилиши қайд этилган. Афғонистон дунёдаги энг йирик афюн ва каннабис етиштирувчи давлатлардан биридир. Мамлакатда наша ишлаб чиқариш ҳажми тўғрисида ишончли маълумотлар мавжуд эмас. БМТ экспертларининг ҳисоб-китобларига кўра, 2009 йилда Афғонистонда наша етиштириш учун мамлакатнинг 17 вилоятида 10 мингдан 24 минг гектаргача майдонлар ажратилган.
