Сингапурда 20 йил ичида биринчи марта аёл киши қатл этилади

Сингапур ҳукумати қарийб 20 йил ичида биринчи марта аёл кишини қатл қилишни режалаштирмоқда. Аёл 30 граммга яқин героин савдосида айбланган. Бу ҳақда Transformative Justice Collective ташкилоти хабар берди.

Маълум қилинишича, 45 ёшли Сариде Жамани 2018 йилда гиёҳванд моддалар сотишга уринган. Уни 28 июль куни қатл этишмоқчи.

Жамани 2004 йилдан бери Сингапурда ўлим жазосига ҳукм қилинган биринчи аёл бўлди.

Сингапур суд тизими қотиллик, одам ўғирлаш ва 500 граммдан ортиқ наша, 15 граммдан ортиқ героин тарқатганлик учун ўлим жазосини назарда тутади.

Amnesty International инсон ҳуқуқлари ташкилоти 25 июль куни Сингапурни Жаманининг қатлини бекор қилишга чақирди.

“Сингапур ҳукумати гиёҳванд моддаларни назорат қилиш номи билан қатллар сонини кўпайтираётгани ачинарли. Ўлим жазоси гиёҳванд моддаларни истеъмол қилиш ёки уни тарқатишда ноёб тийиб турувчи таъсирга эга экани ҳақида ҳеч қандай далил йўқ. Бутун дунё ўлим жазосини бекор қилиб, гиёҳвандлик сиёсатини ислоҳ этаётган бир пайтда, Сингапур расмийлари бундай қилмаяпти”, — дейилади ташкилот баёнотида.

Amnesty International ташкилоти Бирлашган Миллатлар Ташкилотининг Наркотиклар ва жиноятчиликка қарши кураш бўйича бошқармаси ҳамда Гиёҳванд моддаларни назорат қилиш халқаро кенгашини Сингапур устидан босимни кучайтиришга чақирди.

Апрель ойида Сингапурда каннабис савдоси билан шуғулланган эркак қатл қилинганди. БМТ бунга норозилик билдирган.