2017 йил охири ҳолатига кўра, Ўзбекистонда рўйхатда турган гиёҳванд беморлар сони 8036 кишини ташкил қилди, шуларнинг 2 фоиздан камроғи — аёллар. Бу ҳақда «Газета.uz» Ўзбекистон Республикаси Вазирлар Маҳкамаси ҳузуридаги Наркотик моддаларни назорат қилиш миллий ахборот-таҳлил маркази мутахассиси Андрей Мокийга таяниб маълум қилди.
Унинг сўзларига кўра, республикада гиёҳванд беморлар қарийб 21 минг нафарни ташкил қилган 2008 йилдан буён наркотик моддалар истеъмолчилари сони 60 фоизга камайган.
Ўтган йили тахминан 800 киши, статистикага кўра, наркотикларни инъекция орқали истеъмол қилиш амалиётини қўллаган.
14 ёшгача бўлган шахсларда гиёҳвандлик ҳолатлари қайд этилмаган, аммо 15—20 ёшдаги шахслар орасида 50 та токсикомания ҳолатлари аниқланган, бу елим ва учар эритувчилар (бензин, ацетон) буғларини суиистеъмол қилишдир.
Гиёҳвандларнинг энг кўп сони Самарқанд, Сурхондарё, Фарғона вилоятлари ва Тошкент шаҳри ҳиссасига тўғри келади, деди марказ вакили барча ҳудудларда пасайиш динамикаси кетаётганини таъкидлар экан.
2000 йилдан буён биринчи марта опий гуруҳидаги препаратлар (опий, героин, кўкнор) истеъмоли каннабис (наша, марихуана) гуруҳиникидан камроқ бўлган.
Шунингдек, ОИТВга чалинганлар орасида гиёҳвандлар улуши камайган. Йиллик тест натижалари кўрсатишича, ОИТВга чалинган гиёҳвандлар улуши кичик, инфекциянинг тарқалиши асосан жинсий йўл билан бўлмоқда.
2017 йилда наркотик воситалар дозасининг ошиб кетиши ёки улардан заҳарланиш туфайли ўлим ҳолатлари рўйхатга олинмаган. Наркотиклар истеъмоли авж олган 2001—2008 йилларда ўлимлар сони 100 тагача етган.
Изоҳ (0)