Tailand hukumati kannabis (nasha) uchun jinoiy javobgarlikni qayta joriy etishni ko‘zlamoqda. Bu 2022-yildan buyon rivojlanib kelayotgan va qiymati 1 milliard dollardan oshgan sanoat uchun katta tahdid hisoblanadi. Bu haqda Reuters xabar berdi.
Kannabisni qonuniylashtirish tarafdori bo‘lgan “Bxumjaytay” partiyasi hukmron koalitsiyadan chiqqach, hukumat ushbu sohani kuchliroq nazoratga olishga harakat qila boshladi. 24-iyun kuni Sog‘liqni saqlash vazirligi kannabisdan rekreatsion (dam olish) maqsadida foydalanishni taqiqlab, uni chakana xarid qilish uchun shifokor retseptini majburiy qildi.
Kelajakda kannabis giyohvand modda sifatida tasniflanadi, dedi sog‘liqni saqlash vaziri Somsak Tepsutin.
Tailand 2022-yilda Osiyoda birinchilardan bo‘lib kannabisni dekriminallashtirgandi. Biroq bu sohani tartibga soluvchi aniq va qat’iy qoidalar joriy qilinmagan. O‘shandan beri Tailand bo‘ylab o‘n minglab do‘konlar va kannabis savdosi bilan shug‘ullanuvchi korxonalar paydo bo‘lgan.
Ularning aksariyati sayyohlik zonalarida joylashgan. Tailand Savdo palatasi hisob-kitobiga ko‘ra, 2025-yilgacha ushbu sanoat, dori-darmon mahsulotlarini ham qamrab olgan holda, 1,2 milliard dollarga yetishi mumkin.
Sayyohlar Tailandda kannabis iste’mol qilish mumkinmi?
Ruxsat etilgan: 20 yoshdan katta fuqarolar uchun uy sharoitida marixuana (kannabis) iste’mol qilishga ruxsat bor. Shuningdek, litsenziyaga ega restoranlarda kannabis qo‘shilgan mahsulotlar iste’moli ham mumkin. Tailand Sog‘liqni saqlash vazirligi marixuana iste’mol qilgandan keyin rulga o‘tirmaslikni tavsiya qilgan.
Taqiqlangan: Jamoat joylarida — maktablar, savdo markazlari va boshqa ochiq joylarda marixuana chekishga ruxsat yo‘q. Qoidabuzarlar 25 ming bat (650 yevro) jarimaga yoki 3 oygacha qamoq jazosiga tortilishi mumkin. Sayyohlar uchun kannabis va uning urug‘larini mamlakatga olib kirish yoki olib chiqish qat’iyan man etilgan.
2018-yil oxirida Tailand hukumati fuqarolarga tibbiy maqsadlarda kannabis iste’mol qilishga ruxsat bergan. 2019-yildan esa ushbu qonun sayyohlarga ham tatbiq etila boshlangan.
Izoh (0)