Жанубий Африка ҳукумати мамлакатда каннабис етиштиришни қонунийлаштирган. Бу ҳақда ҳукуматдаги манбаларга асосланиб, Al Jazeera нашри хабар берди.
Эндиликда ЖАР фуқаролари учун каннабис ўсимлиги етиштириш ва ундан фойдаланишда чекловлар бўлмайди. Таҳлилчилар каннабисга муносабат борасида Африка қитъасининг бошқа мамлакатлари ҳам ЖАРдан андоза олишга уриниши мумкинлиги ҳақида фикр билдирган.
Манбада айтилишича, 27 май куни бўлиб ўтадиган умумий сайловларда ҳукмрон “Африка миллий конгресси” партияси 30 йиллик фаолияти давомида илк бор парламент ўринларининг кўпчилигидан маҳрум бўлган. Бу воқеадан сўнг барча соҳалар қаторида гиёҳванд моддалар қонунчилигига ҳам ўзгартиришлар киритилган.
Жанубий Африка президент Сирил Рамафоса “Каннабисдан шахсий мақсадлар учун фойдаланиш тўғрисида”ги актни имзолаган. Шу тариқа Жанубий Африка марихуанадан фойдаланишни қонунийлаштирган биринчи Африка давлатига айланган.
Қонун лойиҳаси каннабисни мамлакатда тақиқланган гиёҳванд моддалар рўйхатидан олиб ташлайди, яъни катталар энди ўсимликни ўстириш ва истеъмол қилишлари мумкин (болалар бундан мустасно). Қонун лойиҳасида, шунингдек, каннабис истеъмоли ёки савдоси кўринишида қонунбузарликлар содир этган шахсларнинг жиноий қайдлари автоматик равишда ўчириб ташланиши белгилаб қўйилган. Ҳозирда ЖАР қамоқхоналарида каннабис билан боғлиқ жиноят ишида айбланиб қамалган уч мингдан ортиқ маҳбус борлиги маълум қилинган.
Бир қатор расмийлар ушбу қонун мамлакат ёшлари ичида гиёҳванд моддаларга қарамлик кучайишига олиб келиши ҳақида огоҳлантирган. Ҳукумат эса каннабис савдоси аллақачон мамлакатнинг ҳар бир бурчагида давом этаётгани, унга қарши курашиш имконсиз экани ва аллақачон жамият ҳаётида мавжуд бўлган омилга қонуний тус берилганини айтган.
Маълумот ўрнида, каннабис Жаҳон соғлиқни сақлаш ташкилоти томонидан расман ўткир гиёҳванд моддалар рўйхатига киритилган. Шунга қарамай, бугунги кунда 6 мамлакат: Малта, Канада, Уругвай, Мексика, Грузия ва Жанубий Африкада уни етиштириш ва истеъмол қилиш қонунийдир.
Изоҳ (0)