Афғонистоннинг Ғазни вилоятида гиёҳвандлик билан касалланганларни даволаш марказидан чиққан одамлар у ерда шароит йўқлигидан шикоят қилди. Бу ҳақда Hasht-e Subh Daily хабар берди.
Даволаниб чиққан одамларнинг сўзларига кўра, даволаниш вақтида уларга фақат уйқу препаратлари берилган. Бундай дориларни қабул қилганлар орасида яқинда даволаниб чиққан 25 киши бор, улар 45 кунлик даволаниш муддатини тугатгандан сўнг шифохонадан чиқарилган.
Гиёҳвандлар аввал ҳам ушбу марказда бир неча марта даволанган бўлса-да, бу одамларнинг аксарияти танаффусдан сўнг иш билан таъминланмагани учун яна гиёҳвандликка боғланган.
Daily Mail нашри “Толибон” уйсиз гиёҳвандларни йиғиб, уларни даволаш учун уч ойга касалхоналарга қамаб қўйишини маълум қилганди. Хусусан, Кобулдаги касалхоналарда гиёҳвандлар оғир шароитда яшаши: битта каравотда уч киши бўлиб ётиши, баъзилари ўт ейишга мажбур бўлиши келтирилган.
Шунингдек, нашр касалхонадан чиққан беморнинг сўзларига таяниб, одамлар мушукларни еб, каннибализмга (биологияда ҳайвонларнинг озиқ етишмовчилигидан ўз туридагиларни ейиши ёки одам гўштини одам ейиши) ўтишга мажбур бўлганини хабар қилган.
Маълумот ўрнида, “Толибон” ҳаракати раҳбари мулла Ҳайбатулла Охундзода Афғонистонда марихуана етиштиришни тақиқлаган. Қонунга бўйсунмаганларни судга тақдим этиш буюрилган. “Толибон”нинг суд муассасаларига ҳам қонунбузарларни шариат асосида жазолаш топширилган.
Афғонистон дунёдаги энг йирик афюн ва каннабис етиштирувчи давлатлардан биридир. Мамлакатда наша ишлаб чиқариш ҳажми тўғрисида ишончли маълумотлар мавжуд эмас. БМТ экспертларининг ҳисоб-китобларига кўра, 2009 йилда Афғонистонда наша етиштириш учун мамлакатнинг 17 вилоятида 10 мингдан 24 минг гектаргача майдонлар ажратилган.
Изоҳ (0)