Индонезия лигасининг америкалик баскетболчиси мамлакатга ноқонуний гиёҳванд моддаларни олиб киришга урингани учун ҳибсга олинди. Унга ўлим жазоси тайинланиши мумкин. Бу ҳақда Индонезия полициясига таяниб CNN хабар берди.
Техаслик 34 ёшли Жарред Дуэйн Шоу 7 май куни ҳибсга олинган. Полициячилар унинг Жакартадаги квартирасига бостириб кирганда 132 қадоқ каннабис борлигини аниқлаган.
Индонезия аэропорти божхонасига кўра, баскетболчи Таиланддан шубҳали жўнатма қабул қилган. 2024 йил ноябрь ойидан бери Таиландда каннабис легаллаштирилган. Шоу Индонезиянинг гиёҳвандликка қарши қонунларига кўра айбдор деб топилса, умрбод қамоқ ёки ўлим жазосига ҳукм қилиниши мумкин.
Спортчи 2022 йилдан бери Индонезия Баскетбол Лигасининг бир нечта клубларида ўйнаб келади. 2024 йилда “Tangerang Hawks” билан шартнома имзолаган. Сўроқ пайтида Шоу полицияга каннабисни бошқа баскетболчилар билан баҳам кўрмоқчи эканлигини айтган. Унинг сўзларига кўра, гиёҳванд модда қадоғи ичида жами 869 грамм ноқонуний каннабис бўлган.
“Tangerang Hawks” бош мураббийи Тикки Сувантикно 15 май куни журналистларга Шоунинг қилган ишидан афсусда эканликларини ва клуб шартномани бузгани учун уни дарҳол жамоадан четлатганини маълум қилган. Индонезия Баскетбол Лигаси спортчига умрбод ўйнашни тақиқлаган.
Бирлашган Миллатлар Ташкилотининг Гиёҳванд моддалар ва жиноятчилик бўйича бошқармасига кўра, қатъий қонунларига қарамай, Индонезия гиёҳванд моддалар контрабандасининг йирик марказидир.
Индонезияда 530 га яқин одам, шу жумладан 96 нафар хорижлик, ўлим жазосига ҳукм қилинган. Уларнинг аксарияти гиёҳванд моддалар билан боғлиқ жиноятлар учун айбдор деб топилган. Мамлакатда охирги марта 2016 йил июль ойида бир индонезиялик ва уч нафар хорижлик қатл этилган эди.
Изоҳ (0)