Исроил армияси штаб бошлиғи Эял Замир Эронга қарши уруш ҳали тугамаганини маълум қилди. Бу ҳақда Iran International хабар берди.
Генерал тегишли баёнотни Эрон-Исроил ўртасида ўт очишни тўхтатиш бўйича сулҳ жорий этилгач эълон қилган.
“Муҳим бобни якунлаяпмиз, аммо Эронга қарши уруш тугамади. Биз жорий ҳарбий ҳаракатда эришилган ютуқларга асосланган янги бобга ўтмоқдамиз”, деди Замир.
Замир 12 кунлик уруш давомида Эроннинг ядровий ва ракета дастурлари сезиларли даражада яксон қилинганини айтган. У Исроил ҳарбийлари ва фронторти қўмондонлигининг ҳаракатларини юқори баҳолаган.
“Бу мисли кўрилмаган ютуққа қарамай, биз оёқда мустаҳкам туришимиз керак. Олдинда ҳали кўп қийинчиликлар бор. Диққатимизни жамлашимиз лозим, ютуқларимиз билан хотиржам бўлишга вақт йўқ. Энди эътибор Ғазога — гаровга олинганларни қайтариш ва ҲАМАС бошқарувини йўқ қилишга қаратилади”, дея қўшимча қилган.
АҚШ президенти Дональд Трамп Исроил ва Эрон ўртасида ўт очишни тўхтатиш бўйича келишувга эришилгани ҳақида 24 июнь куни маълум қилган эди. Эрон хавфсизлик кенгаши сулҳга эришилганини тасдиқлаб, Исроил устидан ғалаба қозонилганини эълон қилган.
Изоҳ (0)