АҚШ Вакиллар палатасининг барча ходимларига юборилган хизмат хатига кўра, WhatsApp хабар алмашиш хизмати Палатанинг барча қурилмаларида тақиқланди. Бу ҳақда Reuters агентлиги хабар бермоқда.
“Киберхавфсизлик бошқармаси WhatsApp’ни фойдаланувчилар маълумотларини ҳимоя қилишда шаффофликнинг йўқлиги, сақланаётган маълумотларнинг шифрланмаганлиги ва иловадан фойдаланишда юзага келиши мумкин бўлган хавфсизлик таҳдидлари туфайли фойдаланувчилар учун юқори хавф деб баҳолади”, дейилади ходимларга юборилган хабарда.
Шунингдек, бош маъмурий ходимнинг эслатмасида Microsoft Теамс, Аmazon’нинг Wickr иловаси, Signal ҳамда Apple’нинг iМessege ва FaceТimе каби муқобил иловалардан фойдаланиш тавсия этилган.
Мета компанияси вакили Энди Стоун компания “АҚШ Конгресси Вакиллар палатаси аппарати раҳбарининг таърифига мутлақо қўшилмаслигини” билдирган.
“Биз Вакиллар палатаси аъзолари ва уларнинг ходимлари WhatsApp’дан мунтазам фойдаланишларини биламиз ва умид қиламизки, Вакиллар палатаси аъзолари Сенатдаги ҳамкасбларига қўшилиб, буни расмий равишда қўллашни давом эттирадилар”, деди Стоун.
Бундан аввал Вакиллар палатаси хизмат қурилмаларида баъзи иловаларни тақиқлаган эди. Хусусан, TikTok 2022 йилда хавфсизлик нуқтайи назаридан тақиқланган.
Изоҳ (0)