AQSH Vakillar palatasining barcha xodimlariga yuborilgan xizmat xatiga ko‘ra, WhatsApp xabar almashish xizmati Palataning barcha qurilmalarida taqiqlandi. Bu haqda Reuters agentligi xabar bermoqda.
“Kiberxavfsizlik boshqarmasi WhatsApp’ni foydalanuvchilar ma’lumotlarini himoya qilishda shaffoflikning yo‘qligi, saqlanayotgan ma’lumotlarning shifrlanmaganligi va ilovadan foydalanishda yuzaga kelishi mumkin bo‘lgan xavfsizlik tahdidlari tufayli foydalanuvchilar uchun yuqori xavf deb baholadi”, deyiladi xodimlarga yuborilgan xabarda.
Shuningdek, bosh ma’muriy xodimning eslatmasida Microsoft Teams, Amazon’ning Wickr ilovasi, Signal hamda Apple’ning iMessage va FaceTime kabi muqobil ilovalardan foydalanish tavsiya etilgan.
Meta kompaniyasi vakili Endi Stoun kompaniya “AQSH Kongressi Vakillar palatasi apparati rahbarining ta’rifiga mutlaqo qo‘shilmasligini” bildirgan.
“Biz Vakillar palatasi a’zolari va ularning xodimlari WhatsApp’dan muntazam foydalanishlarini bilamiz va umid qilamizki, Vakillar palatasi a’zolari Senatdagi hamkasblariga qo‘shilib, buni rasmiy ravishda qo‘llashni davom ettiradilar”, dedi Stoun.
Bundan avval Vakillar palatasi xizmat qurilmalarida ba’zi ilovalarni taqiqlagan edi. Xususan, TikTok 2022-yilda xavfsizlik nuqtayi nazaridan taqiqlangan.
Izoh (0)