Сиёсатчи Алексей Навальний Ғарб мамлакатлари ва халқаро IT-корпорацияларни Кремлнинг ҳарбий пропагандасига қарши ахборот фронтини тузишга чақирди. Покровск колониясида жазони ўтаётган россиялик мухолифатчининг мурожаати унинг Twitter’даги саҳифасига жойлаштирилган.
«Украиналикларни ўлдириш учун Путинга Россия ичкарисида кўмак керак бўлади. Англаб етиш зарур бўлган биринчи жиҳат Россияда Украинадаги урушни 75 фоизга қўллаб-қувватлаш йўқлиги. Бу Кремлнинг ёлғони. Россияда ортда қолган бир ярим ой давомида барча мустақил ОАВ ёпилди ёки блокланди, ҳатто анча эҳтиёткор нашрлар ҳам тақиққа учради. Агар мамлакат ичида кўпчилик Украина билан урушни қўллаб-қувватлаганида бу каби блоклашлар кузатилармиди?», – деб ёзган Навальний.
Цензура ва давлат пропагандаси туфайли россияликларнинг аксар қисмида Украинадаги уруш ҳақида нотўғри тушунча ҳамда ахборот пайдо қилинмоқда, аммо гарчи ижтимоий тармоқлар блокировка қилинганига қарамай Россиядаги вояга етган 85 фоиз одамлар ҳар куни Meta (Facebook, Instagram, WhatsApp) ва Google (YouTube) сервисларидан фойдаланмоқда, дейилади сиёсатчининг твитида.
Навальний ижтимоий тармоқларда россиялик фойдаланувчилар учун урушга қарши кенг қамровли кампанияни бошлаш керак деб ҳисобламоқда.
Бизга реклама керак. Жуда кўп реклама зарур. Урушга қарши улкан миллий кампания рекламалар мажмуидан бошланади. Рекламалардаги кунига 200 миллион кўришлар ҳар бир россиялик учун икки мартадан кўрсатилганини англатади. Сторизлар, постлар ва прероллар кўпайиши лозим. Россия бўйлаб шаҳарлар-у, қишлоқларда ҳар бир телефон ҳамда планшетда ахборот берилиши муҳим.Сиёсатчи АҚШ президенти Жо Байден, Буюк Британия бош вазири Борис Жонсон, Евроиттифоқ вакиллари Урсула фон дер Ляен ва Жозеп Боррелни ижтимоий тармоқларда реклама харид қилишга, бу орқали россияликларга Украинадаги уруш ҳақида ҳақиқатни айтишга чақирди.
Шунингдек, у ҳарбий цензура вақтида мустақил ОАВга ёрдам кўрсатиш зарурлигини қайд этди. Meduza, «Проект», The Insider, «Медиазона», «Важние истории», BBC Рус хизмати, Deutsche Welle, «Америка овози» рус хизмати шулар жумласидан.
Бу худди сайловлардаги каби катта миллий реклама кампаниясига айланиши керак. Бизнинг номзод «Тинчлик» Путин томонидан номзоди илгари сурилган «Уруш»га қарши туради. Тинчлик ғалаба қозониши шарт. Бундан бошқасини тасаввур ҳам қила олмаймиз.Алексей Навальний
Изоҳ (0)