АҚШнинг 73 ёшли собиқ дипломати Мануэль Роша 12 апрель куни Кубада узоқ йиллар давомида махфий агент сифатида ишлаганини учун 15 йилга федерал қамоқ жазосига ҳукм қилинди. Бу ҳақда Associated Press (AP) хабар берди.
Хабарга кўра, Роша 500 000 доллар жарима тўлайди ва чет эл ҳукуматининг агенти сифатида фитна уюштирганликда айбини тан олганидан кейин ҳукумат билан ҳамкорлик қилади. Бунинг эвазига прокурорлар фирибгарлик ва ёлғон баёнотлар бериш айбловларини бекор қилган.
Мен тўлиқ жавобгарликни ўз зиммамга оламан ва жазони қабул қиламан, — деди Роша суд жараёнида.
Рошанинг ҳукми 1981 йилдан бери Куба номидан “яширин фаолият” билан шуғулланганликда айбланиб, Майамида ҳибсга олинганидан олти ой ўтмай эълон қилинди.
Прокурорларнинг таъкидлашича, Рошанинг алдови йиллар давомида аниқланмаган, чунки Айви лигасида таҳсил олган дипломат кубалик тезкор ходимлар билан яширинча учрашиб, АҚШ расмийларига кубаликлар билан алоқалари ҳақида ёлғон маълумот берган.
Марказий разведка бошқармаси 1987 йилдаёқ Куба етакчиси Фидель Кастронинг АҚШ ҳукумати ичида “супер юмронқозиқ” кўмилганини билган ва баъзи расмийлар бу Роша бўлиши мумкин деб гумон қилган, — дея таъкидлайди AP нашри.
Роша Боливия, Аргентина, Мексика, Гаванада юқори лавозимларда фаолият юритган.
Роша ўзини Куба разведкаси ходими сифатида кўрсатган махфий агент билан яширинча ёзиб олинган суҳбатларда айбланган. Агент дастлаб WhatsApp орқали Роша билан боғланиб, ўзини “Мигел” деб атаган ҳамда “Гаванадаги дўстларидан” хабар борлигини айтган
Роша суҳбатларда АҚШни “душман” деб атаган ва унинг 40 йилдан ортиқ вақт давомида АҚШ ташқи сиёсатчилари қалбида кубалик “юмронқозиқ” сифатида хизмат қилгани билан мақтанган, — дейди прокурорлар.
Изоҳ (0)