Хитой Эксимбанки Ўзбекистонга телекоммуникация ривожи учун кредит ажратди. Бу ҳақда Инвестициялар, саноат ва савдо вазирлиги хабар берди.
Маълум қилинишича, 21 июнь куни вазирлик раҳбари Лазиз Қудратов Хитой Экспорт-импорт банки бошқаруви раиси Чен Хуайюй билан учрашув ўтказди, унинг якунида телекоммуникация соҳасида 500 миллион АҚШ долларига тенг миқдорда қарз шартномаси имзоланди.
Лазиз Қудратов лойиҳа тезкор ва самарали амалга оширилишининг муҳимлигини таъкидлаб, IT соҳасидаги лойиҳаларни Эксимбанк томонидан қўллаб-қувватланиши ижобий натижалар беришига ишонч билдирди.
Учрашув давомида амалдаги келишувлар ижроси ва янги йўналишлар бўйича ҳамкорлик истиқболлари, жумладан, гидроэнергетика объектлари қурилиши, қишлоқ хўжалиги соҳасининг барқарор ривожланишига ва транспорт инфратузилмасини модернизация қилишга хизмат қилувчи лойиҳалар муҳокама қилинган.
2002 йилдан буён Хитой Эксимбанки билан ҳамкорликда умумий қиймати 3,2 миллиард АҚШ долларига тенг бўлган 51 та лойиҳа амалга оширилди. Улар замонавий инфратузилма қурилиши, “яшил” энергетика, транспорт, қишлоқ ва сув хўжалиги, таълим, соғлиқни сақлаш ва бошқа соҳаларни қамраб олган. Айни пайтда 1,9 миллиард доллар қийматидаги икки лойиҳа амалга оширилмоқда, 2,2 миллиард доллар миқдоридаги 13 лойиҳа эса кўриб чиқилмоқда.
Миллий статистика қўмитаси маълумотларига кўра, 2025 йилнинг январь—апрель ойларида телекоммуникация хизматлари ҳажми 7,7 трлн сўмни ташкил этди. Телекоммуникация хизматлари ҳажми 2024 йилнинг мос даврига нисбатан 14,4 фоизга ошган. 2024 йилнинг январь—апрель ойларида бу кўрсаткич 6,4 триллион сўмни ташкил этган.
2025 йилдан Ўзбекистонда фаолият юритадиган, мобил ёки симли телекоммуникация тармоқларига эга телекоммуникация операторларига синов тариқасида халқаро Интернет тармоқларига ўз тижорат эҳтиёжлари учун тўғридан тўғри уланиш ҳуқуқи берилди.
Изоҳ (0)