Депутатлар ўрта таълим мактабларини етарли миқдорда лаборатория жиҳозлари билан таъминлаш ҳамда эскирган ўқув ускуналарини алмаштириш бўйича маблағларни кўпайтиришни талаб қилди. Бу ҳақда «Дарё»га Олий Мажлис Қонунчилик палатаси матбуот хизмати хабар берди.
Қайд этилишича, Парламент мажлисида «2020 йил учун Ўзбекистон Республикасининг Давлат бюджети тўғрисида»ги қонун лойиҳаси биринчи ўқиши жараёнида депутатлар қонун лойиҳасида умумтаълим мактабларини жиҳозлаш учун ажратилиши кўзда тутилган 97 миллиард сўм маблағ етарли эмаслигини билдирган.
Ҳукумат аъзолари билан кечган муҳокама ва музокаралардан сўнг парламент аъзолари томонидан кўтарилган бу масала ҳал этилиши билдирилган.
Қонун лойиҳасини иккинчи ўқишдаги муҳокамалар чоғида 2020 йил учун Давлат бюджети лойиҳасига умумтаълим мактабларини жиҳозлаш қўшимча равишда давлат бошқарув органлари харажатларини мақбуллаштириш ҳисобидан 50 миллиард сўм маблағ ажратилиши маълум қиланган.
Маълумот учун, Корея Республикаси билан имзоланган келишувга асосан, Жанубий Кореянинг Экспорт-импорт банки (Эксимбанк) томонидан ажратилган 33 миллион доллар миқдоридаги имтиёзли кредит маблағлари ҳисобига умумтаълим мактаблари учун 2 859 дона синф комплект компьютер синфларини жиҳозлаш кўзда тутилмоқда. 2020 йилнинг якунига қадар барча компьютер синфлари етказиб берилиши режалаштирилган.
Шу билан бирга, 2020 йилнинг 1 мартига қадар умумтаълим мактабларини жиҳозлаш бўйича 5 йилга мўлжалланган алоҳида дастур ишлаб чиқилиши айтилган.
Изоҳ (0)