«Ўзкимёсаноат» компанияси Олий Мажлис Қонунчилик палатаси спикери ўринбосари, «Миллий тикланиш» партияси раҳбари Алишер Қодировнинг Ангрендаги «Биринчи резинотехника заводи» МЧЖ шина ишлаб чиқариш заводи қувватининг 15 фоизида ишлаётгани тўғрисидаги хабарига муносабат билдирди.
«Ўзкимёсаноат»нинг маълум қилишича, Германия, Голландия, Италия, Япония ва Хитой каби хорижий мамлакатларнинг энг замонавий ускуна ва жиҳозлари асосида хорижий кредитлар ҳисобидан 2019 йилда ишга туширилган «Биринчи резинотехника заводи» МЧЖ йиллик 3 миллион дона автомобиль шиналари, 200 минг дона қишлоқ хўжалиги шиналари ва 100 минг погон метр конвейер ленталарини ишлаб чиқариш қувватига эга.
Таъкидланишича, лойиҳа бўйича корхона қувватларни ўзлаштириш маҳсулот сифатини таъминлаш мақсадида босқичма-босқич амалга оширилмоқда.
2019 йилдан бугунги кунга қадар корхона томонидан умумий қиймати 266 миллиард сўм бўлган 704,1 минг дона автомобиль шиналари, 16,9 минг дона қишлоқ хўжалиги шиналари ва 72,9 минг погон метр конвейер ленталари ишлаб чиқарилган.
«Ўзкимёсаноат» матбуот хизматининг тасдиқлашича, 2020 йилда ишлаб чиқариш қувватларини ўзлаштириш режаси ҳақиқатда 40 фоиз ўрнига 15 фоизни ташкил этган. «Бунинг асосий сабаби коронавирус пандемияси даврида жорий этилган чекловлар оқибатида аксарияти хорижий мамлакатлардан олиб келинадиган хом ашё ва материалларнинг импорти чекланди, ишлаб чиқаришда тўхталишлар юзага келди, маҳсулот сотуви пасайди ва айланма маблағларнинг танқислигига олиб келди», — дейилади муносабатда.
Натижада 2020 йил ноябрь ойига келибгина Linglong компанияси ва миллий «Барс» бренди остида шина ишлаб чиқарувчи «Биринчи резинотехника заводи» МЧЖ ўртасида корхона ва маҳсулотларни General Motors корпорацияси талабларига мувофиқ сертификатлашда техник кўмак бериш ва омолагация бўйича ишларни амалга ошириш бўйича 4 йил муддатли шартнома имзоланган.
Ушбу шартнома автомобиль шиналари сифати ва корхонанинг тизимли фаолияти бўйича 30 қисмдан иборат АҚШнинг General Motors корпорацияси томонидан ўрнатилган BIQS талаблари асосида UzAuto Motors АЖ томонидан ишлаб чиқарилаётган автомобиллар учун шиналар етказиб беришни таъминлайди.
«Ҳозирда корхона Хитойнинг LingLong компаниясининг техник кўмаги остида мазкур талабларни бажариш бўйича ишларни якунига етиш арафасида турибди ва жорий йилнинг сентябридан бошлаб Damas автомобиллари учун йил якунига қадар 60 минг дона автомобиль шиналарини етказиб берилади. 2023 йилга келиб эса UzAuto Motors АЖга 7 турдаги 37,4 миллион доллар қийматидаги 1,2 миллион дона автомобиль шиналари етказиб бериш режалаштирилган», — дейилади хабарда.
2021 йилда корхона томонидан умумий қиймати 538,6 миллиард сўм бўлган 1,6 миллион дона автомобиль шиналари, 30 минг дона қишлоқ хўжалиги шиналари ва 73,5 минг погон метр конвейер ленталари ишлаб чиқарилиши ва шу билан биргаликда жами 47 турдаги янги турдаги харидоргир маҳсулотларни ишлаб чиқаришга ўзлаштириш режалаштирилган бўлиб, ишлаб чиқариш қувватларини ўзлаштириш режаси 40 фоизга етказилади.
«Биринчи резинотехника заводи»нинг ягона таъсисчиси «Ўзкимёсаноат» ҳисобланади. Раҳбар сифатида «Ўзкимёсаноат» бошқарув раиси (2004—2010 йиллар), бош вазир ўринбосари (2010—2017 йиллар), «Ўзбекнефтгаз» бошқарув раиси (2012—2018 йиллар), Тошкент вилояти ҳокими (2018—2019 йиллар) ва бошқа шу каби лавозимларда ишлаган Ғуломжон Иброҳимов кўрсатилган (1958 йилда туғилган).
Аввалроқ Алишер Қодиров завод Хитойнинг «Эксимбанк»идан жалб қилинган 156,4 миллион доллар маблағ ҳисобига барпо этилгани ва у йилига 3 миллион дона шина ишлаб чиқариши ҳамда шиналар UzAuto Motors’да импорт ўрнини қоплаши кераклигини таъкидлаганди. Бироқ «сифатининг ёмонлиги сабаб» 100 минг шина сотилмай қолган, бу давр оралиғида эса UzAuto Motors 60 миллион долларлик авторезинани импорт қилган.
2020 йилда Инқирозга қарши курашиш жамғармаси томонидан шина заводига 40 миллиард сўм миқдорида бирламчи харажатларни қоплаш учун ссуда ажратилган эди.
Президентнинг 2020 йил 4 апрелдаги фармони билан «Биринчи резотехника заводи» МЧЖга берилган Тикланиш ва тараққиёт жамғармасининг кредитлари «Ўзкимёсаноат»нинг устав капиталидаги давлат улушини ошириш орқали капиталлаштирилди.
2020 йилнинг ноябрида депутат Дониёр Ғаниев ҳукуматни нефть ва газ дунёда энг сердаромад соҳалардан бири бўлишига қарамасдан, «Ўзбекнефтгаз»га 400,9 миллиард сўм миқдорида «қайтарилмас» субсидиялар бергани учун танқид қилган эди. Молия вазири Тимур Ишметов эса «субсидия бериш нефть ва газ соҳасидаги ишларнинг ҳақиқий ҳолатини кўрсатди», деганди.
Бундан ташқари, ҳозирда шиналарнинг импорти учун 20 фоиз, бироқ донасига 5 доллардан кам бўлмаган миқдорда бож тўлаш лозим.
Изоҳ (0)