Шавкат Мирзиёев видеоконференцалоқа орқали Зангиота туманидаги фармацевтика кластери қурилишини бошлаб берди

Ўзбекистон Республикаси Президенти Шавкат Мирзиёевнинг видеоконференцалоқа орқали иштирокида 17 апрель, жума куни, Тошкент вилоятининг Зангиота туманида Tashkent Pharma Park инновацион илмий-ишлаб чиқариш фармацевтика кластери қурилиши бошланди. Бу ҳақда Президент матбуот хизмати хабар берган.

Телемулоқот чоғида давлат раҳбари бу ерда инновацион ва юқори сифат кўрсаткичларига эга бўлган дори-дармонлар, тиббий маҳсулот ва техник воситалар ишлаб чиқариш, аҳолининг бу борадаги талаб ва эҳтиёжларини таъминлаш, замонавий кадрлар тайёрлаш, шунингдек, мамлакатда фармацевтика соҳасини янада ривожлантириш, самарали инфратузилма яратишга қаратилган лойиҳани муваффақиятли амалга ошириш бўйича бошланган ишлар ва режалар билан танишди, дейилади хабарда.

2020 йил январь ойида қабул қилинган Президент қарори билан кластерни ташкил этиш бўйича концепция ва амалий чора-тадбирлар режаси тасдиқланган эди.

Кластер учун Зангиота туманида жами 79 гектарлик ер майдони ажратилган. Жами 14 та инвестицион лойиҳа амалга ошириш орқали минтақада ягона замонавий фармацевтика кластери ҳамда 1700 дан ортиқ янги иш ўрни яратиш кўзда тутилган. Кластер технопарк ва саноат зонасидан иборат бўлади.

Технопарк ҳудудида академик, илмий ҳамда дори-дармонлар ишлаб чиқарадиган секторлар жойлашади. Хусусан, бу ерда Фармацевтика техник университетини ташкил этиш режалаштирилган. Ушбу ўқув даргоҳида дори воситалари, тиббиёт маҳсулотлари ва техникалар, косметология ва бошқа ашёлар ишлаб чиқариш соҳасида халқаро таълим стандартлари даражасидаги юқори малакали кадрлар тайёрланади.

Саноат зонасида етакчи фармацевтика компанияларининг инновацион дори воситалари ишлаб чиқариш майдонлари барпо этилади.

Келгусида бу ерда чет эл клиникалари, тиббиёт марказларини очиш, кластернинг инфратузилмаларини янада ривожлантириш режалаштирилмоқда.

Корея Республикаси «Эксимбанк»ининг Иқтисодий тараққиёт ҳамкорлик фонди билан узоқ муддатли кредит ёрдамида кластернинг илмий ва таълим тузилмаларини молиялаштириш ҳақида келишувга эришилди. Tashkent Pharma Park инновацион илмий-ишлаб чиқариш фармацевтика кластери Ҳомийлик кенгаши ҳамда ривожлантириш дирекцияси тузилган. Унинг фаолиятини Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги амалга оширади.

Ташкил этилаётган кластер соҳада ўзига хос биринчи «илмий шаҳарча» бўлади.