«Ўзбекгидроэнерго» томонидан модернизация лойиҳалари доирасида иккита ГЭС 28 декабрь куни янгидан иш бошлади, дея «Дарё»га хабар қилмоқда компания ахборот хизмати.
Қайд этилишича, Тошкент ГЭСлар каскади унитар корхонаси таркибидаги ГЭС-9 ҳамда Қуйи-Бўзсув ГЭСлар каскади унитар корхонаси таркибидаги ГЭС-14’нинг янги қувватлардаги расмий очилиш маросими бўлиб ўтди.
ГЭС-9 – Тошкент ГЭСлар каскади таркибидаги ГЭС ҳисобланади. У Чирчиқ—Бўзсув трактида Тошкент шаҳрида жойлашган бўлиб, 1943 йилда ишга туширилган.
Маълум қилинишича, узоқ йиллар давомидаги эксплуатация натижасида 75 йилдан ортиқ муддат давомида ГЭСда ўрнатилган электр қурилмалари, технологик ускуналар моддий ва маънавий жиҳатдан эскириб, сўнгги йилларда мазкур ГЭС ўрнатилган қувватларда ишламай қолган эди.
Модернизация натижасида станцияда 1 дона гидроагрегат ўрнига ҳар бирининг қуввати 8,3 мегаваттдан, умумий қуввати 16,6 мегаваттга тенг бўлган, 2 дона гидроагрегат ўрнатилди. ГЭС-9’да янги 16,6 мегаватт қувватли гидроагрегатларни ўрнатиш лойиҳасини амалга ошириш натижасида йиллик электр энергия ишлаб чиқариш кўрсаткичи 95,0 миллион киловатт соатни ташкил этади. Бу ўз навбатида ишлаб чиқариш қувватларини қарийб 2 баробарга оширади.
Янги лойиҳа ишга туширилиши натижасида Тошкент шаҳрининг 60–70 мингга яқин аҳоли хонадонларининг электр энергиясига бўлган талабини ГЭС-9 орқали қоплашга эришилади.
Шунингдек, модернизация лойиҳалари доирасида Қуйи-Бўзсув ГЭСлар каскади унитар корхонаси таркибидаги ГЭС-14’да олиб борилган модернизация жараёнлари муваффақиятли якунланиб, янги қувватларда ишлай бошлади.
ГЭСнинг расмий очилиш маросимида «Ўзбекгидроэнерго»нинг масъул ходимлари, каскад раҳбарияти ва хитойлик ҳамкорлар иштирок этди.
ГЭС-14 Қуйи-Бўзсув ГЭСлар каскади таркибидаги 1-станция ҳисобланиб, Бўзсув каналида Тошкент шаҳридан 15 километр узоқда жойлашган бўлиб, 1944 йилда ишга туширилган.
Модернизация доирасида станцияда 2007 йилдан бери ишламай келган 1 дона 10,7 мегаватт қувватли гидроагрегат ўрнига қуввати 7,5 мегаваттдан, умумий қуввати 15 мегаваттдан иборат 2 дона гидроагрегат ўрнатилди. Уларнинг йиллик электр энергия ишлаб чиқариш кўрсаткичи 90,7 миллион киловатт соатни ташкил этади.
Янги 15 мегаватт қувватли гидроагрегатларни ўрнатиш лойиҳасини амалга ошириш натижасида ГЭС-14 қуввати 4,3 мегаваттга оширилиб, йиллик электр энергия ишлаб чиқариш кўрсаткичининг ортиши кутилмоқда.
Янги лойиҳа ишга туширилиши натижасида Тошкент вилоятининг 50–60 мингга яқин хонадонларининг электр энергиясига бўлган талабини ГЭС-14 орқали таъминлашга эришилади.
«Ўзбекгидроэнерго» томонидан Тошкент ГЭСлар каскади (ГЭС-9) ҳамда Қуйи-Бўзсув ГЭСлар каскади (ГЭС-14) модернизацияси инвестициявий лойиҳалари Хитойнинг «Эксимбанк» кредитини жалб қилган ҳолда амалга оширилди.
Модернизация ишлари жамиятнинг нуфузли хорижий ҳамкори, лойиҳанинг бош пудратчи ташкилоти ҳисобланган Хитойнинг Power Construction оf China Ltd компанияси билан ҳамкорликда амалга оширилди.
ГЭСларда янги ўрнатилган технологик жиҳозлар ақлли автоматлаштирилган бошқарув тизимига уланди. Бу, ўз навбатида, электр қурилмаларини замонавий кузатув камералари орқали реал вақт режимида масофадан кузатиш имкониятини беради.
«Ўзбекгидроэнерго» томонидан 2020 йилда умумий қуввати 118,3 мегаватт бўлган 6 та инвестиция лойиҳалари доирасида 2 та янги ГЭС ва 4 та модернизация доирасидаги ГЭСлар янги қувватларда фойдаланишга топширилди.
2020 йилда амалга оширилган инвестиция лойиҳалари доирасида 543 миллион киловатт соат электр энергиясини ишлаб чиқарилишига замин яратилади. Мазкур лойиҳаларнинг ишга туширилиши натижасида қўшимча 220 дан ортиқ янги ишчи ўринлари яратилди.
Аввалроқ Қашқадарёдаги Оқсу дарёсида ГЭС қурилиши ҳамда Қибрайда 1933 йилда қурилган Қодирия ГЭС модернизация қилингани ҳамда хабар берилганди.
Изоҳ (0)