Президент Шавкат Мирзиёевнинг 5 та муҳим ташаббусини амалга ошириш мақсадида Халқ таълими вазирлиги томонидан республика умумтаълим мактабларида 2859 та ўқув-компьютер синфлари ташкил этилиши белгиланди. Бу ҳақда Халқ таълими вазирлиги ахборот хизмати хабар берди.
Жорий йилнинг 7 июнь куни Халқ таълими вазири Шерзод Шерматов ва КТ компанияси президенти Ю Енг Парк республикада ўқув-компьютер синфларини ташкил этиш бўйича шартномани имзолади.
Жанубий Кореянинг КТ компанияси «Мактаб таълимида ахборот-коммуникация технологияларини янада ривожлантириш» лойиҳаси бўйича ўтказилган тендерда ғолиб бўлди. Лойиҳа Корея Республикасининг Экспорт-импорт банки (Эксимбанк) ажратган 33 миллион доллар кредит ҳисобига молиялаштирилади.
Лойиҳа доирасида КТ компанияси 2766 та умумий ўрта таълим мактаблари синфларига жами 2859 та ўқув-компьютер етказиб, ўрнатиб беради. 2019 йил охирига қадар ўқув-компьютерлар 700 га яқин мактабларга етказиб берилиши кутилмоқда.
Халқ таълими вазири Шерзод Шерматов Жанубий Корея Ўзбекистоннинг ишончли ҳамкорларидан бири эканлигини, шунингдек, лойиҳа биргаликда муваффақиятли амалга оширилишини айтиб ўтди.
Шу муносабат билан Халқ таълими вазирлиги ўқув дастури, жумладан, ахборот технологияларини ўқитиш бўйича дастурларни қайта кўриб чиқмоқда.
Изоҳ (0)