Ўзбекистон 2016 йилнинг 4-чорагида халқаро молия институтлари билан 508 млн долларлик кредит битимларини имзолади

Ўзбекистон ҳукумати 2016 йилнинг тўртинчи чорагида халқаро молиявий институтлар билан 508 миллион долларлик кредит битимларини имзолади, дея хабар бермоқда UzDaily.

Хусусан, Ўзбекистон ҳукумати ва Жаҳон банки «Ҳудудий автомобиль йўлларини ривожлантириш» лойиҳаси доирасида 200 миллион долларлик кредит битимини тузди. Лойиҳа қиймати 240 миллион долларни ташкил этади.

Ўзбекистон, шунингдек, Ислом тараққиёт банки билан «Сирдарё вилоятининг Гулистон, Ширин ва Янгиер шаҳарлари канализация тизимларини реконструкция қилиш ва кенгайтириш» лойиҳасини молиялаштириш бўйича кредит битимини имзолади. Кредит қиймати 57,5 миллион доллар, лойиҳа қиймати эса 60,8 миллион долларга тенг.

36,5 миллион долларлик «Самарқанд шаҳрида қаттиқ маиший чиқиндиларни бошқаришни модернизация қилиш» лойиҳасини амалга ошириш бўйича эса Франция тараққиёт агентлиги билан 23,5 миллион долларлик кредит шартномаси тузилди.

Шунингдек, 2016 йилнинг тўртинчи чорагида Ўзбекистон Кореянинг «Эксимбанк»и билан иккита кредит битимини имзолади. Улар «Тошкент шаҳри аэропортининг янги халқаро йўловчи терминалини қуриш» ҳамда «‘Электрон ҳукумат’ тизимининг Маълумотларга ишлов бериш марказини яратиш» лойиҳалари доирасида тузилди.