Афғонистон Самарқанддаги Имом Бухорий мажмуаси қурилиши учун 16 та юк машинасида Ҳирот оқ мармари ҳадя қилди. Бу ҳақда Сурхондарё вилояти ҳокимлиги матбуот хизмати хабар берди.
Маълум қилинишича, 13 май куни Термиз халқаро савдо марказида Ўзбекистон президентининг Афғонистон бўйича махсус вакили Исматилла Эргашев, Сурхондарё вилояти ҳокими Улуғбек Қосимов, Афғонистон бош вазири котибияти раҳбари Мулло Абдул Восе ҳамда Балх вилояти губернатори Муҳаммад Юсуф Вафо раҳбарлигидаги делегациялар иштирокида учрашув бўлиб ўтди.
Мулоқот чоғида икки давлат ўртасидаги кўп қиррали ҳамкорлик, жумладан, савдо, транспорт, гуманитар ва маданий алоқаларни янада кенгайтириш масалалари муҳокама қилинди. Учрашув якунида Афғонистон томонидан Самарқанд шаҳрида барпо этилаётган Имом Бухорий мажмуаси қурилиши учун юборилган 16 та юк машинасидаги Ҳирот оқ мармари Ўзбекистон томонидан қабул қилиб олинди.
-DdS3rpZG.avif)
Ҳозир Ҳирот оқ мармар тошидан Арабистон, Россия, Эрон каби давлатларда кенг фойдаланилаётганини маълум қилиниб, унинг ноёб хусусиятлари ҳақида фикр алмашилди.
“Бу тошга дунёда катта қизиқиш мавжуд. У иссиқда исиб, совуқда совиб кетмайди. Тозаланиши ҳам жуда осон. Ўзига сув юқтирмайди. Бугун тўрт минг квадрат метр ҳажмда мармар тош олиб келдик. Иккинчи босқичи ҳам тайёр бўлиши билан Ўзбекистонга етказилади”, деган Афғонистон ТИВ Балх вилоятидаги ваколатхонаси раҳбари Мавлавий Аминуллоҳ Содиқ.
-BDHJP_5Q.avif)
-ePzWWOSG.avif)
Афғонистон томони оғир кунларда Ўзбекистон кўрсатган беғараз ёрдам учун чуқур миннатдорлик билдирди.
12 май куни Ўзбекистондан Афғонистон фермерлари ва аграр тузилмаларига беғараз ёрдам тариқасида 26 тоннадан ортиқ қишлоқ хўжалиги маҳсулотлари уруғлари етказиб берилганди.
Изоҳ (0)