Ijtimoiy tarmoqlarda Eron va Isroil davlatlari o‘rtasida kuzatilayotgan ziddiyatli vaziyat atrofida turli munosabatlar bildirilmoqda. O‘zbekiston Tashqi ishlar vazirligi ushbu holat yuzasidan fikr bildirishda o‘zbekistonliklarga tavsiyalar berdi.
TIVga ko‘ra, ayrim foydalanuvchilar insonlarning muqaddas eʼtiqodi bilan bog‘liq tuyg‘ulari bilan o‘ynashib, turli postlar va izohlar joylamoqda.
Mazkur mojaro yuzasidan O‘zbekiston rasmiy munosabat bildirgani qayd etib o‘tildi. Tashqi ishlar vazirligi ikki tomonni to‘liq vazminlikka, harbiy harakatlarni darhol to‘xtatishga va nizoni siyosiy-diplomatik yo‘l bilan hal etishga chaqirdi.
TIVning qayd etishicha, O‘zbekiston ikki davlat bilan ham o‘zaro mustahkam diplomatik aloqalarga ega. Eron—Isroil mojarosi O‘zbekistonning ham manfaatlariga javob bermaydi.
“Insonlarning halokatiga sabab bo‘luvchi mazkur ziddiyatli vaziyat yuzasidan munosabat bildirishda aholimiz vahimaga berilishi, ehtiros va his-hayajonlarga tayanib fikrlashi turgan gap”, deyiladi xabarda.
O‘zbekiston TIV bu kabi holatlarda qanday yo‘l tutish kerakligini eslatib o‘tdi:
- 1-eslatma: sovuqqon, mulohazali va bag‘rikeng bo‘ling.
- 2-eslatma: harbiy mojaroga din va eʼtiqodlar to‘qnashuvi rakursida qaramang.
- 3-eslatma: vazmin pozitsiyada bo‘ling.
- 4-eslatma: tekshirilgan, ishonchli axborot manbalaridan foydalaning.
- 5-eslatma: din, mazhab yoki eʼtiqod asosida shaxsiy yoki umumiy xulosalar chiqarmang. Chunki bu jamiyatda bo‘linish, qarama-qarshilik va radikal kayfiyat shakllanishiga sabab bo‘ladi.
- 6-eslatma: davlat organlari matbuot xizmatlari va boshqa rasmiy mutaxassislar fikrlarini kuzating.
- 7-eslatma: fikr bildirishda va axborot tarqatishda jamiyat barqarorligi va shaxsiy masʼuliyatni unutmang.
O‘zbekiston Tashqi ishlar vazirligi Isroilning Eronga hujumlari yuzasidan xavotir bildirgandi. Vazirlik barcha tomonlarni to‘liq vazminlikka, harbiy harakatlarni darhol to‘xtatishga va nizoni siyosiy-diplomatik yo‘l bilan hal etishga chaqirgan.
O‘zbekiston Tashqi ishlar vazirligi Yaqin Sharqda tobora keskinlashayotgan harbiy-siyosiy vaziyat munosabati bilan Eron va Isroilda bo‘lgan O‘zbekiston fuqarolariga tavsiyalar bergan edi. Jumladan:
- harbiy va boshqa davlat obyektlariga yaqinlashmaslik, ularni foto va videoga olmaslik;
- odamlar ko‘p to‘planadigan joylardan yiroqda bo‘lish;
- mahalliy hukumat organlari tomonidan berilayotgan ko‘rsatmalarga so‘zsiz rioya qilish, zarurat tug‘ilganda maxsus boshpanalarga yoki xavfsiz joylarga yo‘l olish.
Fuqarolardan zarurat tug‘ilganda O‘zbekistonning Eron va Isroildagi diplomatik vakolatxonalari bilan bog‘lanish so‘raldi.
Izoh (0)