Эроннинг Исроилга қарши амалга оширган тўрт босқичли ракета ҳужуми оқибатида 3 киши ҳалок бўлди ва камида 70 киши жароҳат олди. Бу ҳақда The Jerusalem Post газетаси тез тиббий ёрдам хизматига асосланиб маълум қилди.
Маълумотларга кўра, 14 июнь куни эрталаб Исроилнинг марказий қисмидаги турар-жой биноларига тўғридан-тўғри ракета тушиши оқибатида 1 киши ҳалок бўлган, 19 киши яраланган.
Янгиланган маълумотларга кўра, зарбалар оқибатида 70 дан ортиқ киши жабрланган. Эрон кучлари Тель-Авив марказидаги Исроил армияси, мамлакат Мудофаа вазирлиги ва бошқа идоралар томонидан фойдаланиладиган махсус ҳудуд - Кирия мажмуасига зарба берди. Аниқланишича, ракеталардан бири мажмуа ҳудудидаги бинолардан бирига келиб тушган.
Шу билан бирга, Эрон ўз ракеталарининг Тель-Авивдаги белгиланган нишонларга теккани ҳақида маълум қилди. Улар ҳарбий базалар, мудофаа ва миллий хавфсизлик вазирлигини назарда тутмоқда. Исроил томонининг хабар беришича, ушбу ҳужум натижасида фақат фуқаролик объектларига зарар етган.
13 июнга ўтар кечаси Исроил қўшинлари Эронга қарши ҳарбий операция бошлаб, Ислом Республикасининг бир неча аҳоли пунктларидаги объектларга зарбалар берди. Жумладан, Теҳрондаги Ислом инқилоби қўриқчилари корпуси (ИIQК) штаб-квартираси ҳам нишонга олинган.
Кейинроқ Эрон Атом энергияси ташкилоти (ИАЭТ) раҳбари Муҳаммад Эсломий Исроил ҳужумлари натижасида Натанздаги ядровий объектга жиддий зарар етмаганини маълум қилди.
Исроил Мудофаа армияси 13 июнь куни кечқурун Эрон томонидан кўп миқдорда ракеталар учирилгани ҳақида хабар берди.
САХАЛ баёнотида ҳаво ҳужумидан мудофаа тизимлари таҳдидни бартараф этиш учун ишга туширилгани қайд этилди. Аҳолига хавфсиз жойларга яшириниб, кейинги кўрсатмаларни кутиш тавсия этилган.
Изоҳ (0)