Эрон президенти Масъуд Пезешкиён мамлакатига қарши ҳар қандай ҳужумга жавоб берилишини маълум қилди. Бироқ Исроил минтақадаги тажовузни тўхтатиб, сулҳ тузишга рози бўлса, бу жавобнинг хусусияти ва даражаси ўзгаришини айтди. Бу ҳақда Anadolu хабар берди.
Вазирлар маҳкамасининг йиғилишида сўзга чиққан Пезешкиён Исроилнинг кучайиб бораётган тажовузкорлигига тўхталди. У АҚШ ва Европа етакчиларининг берган ваъдасини эсга олди. Улар Эрон ҲАМАС сиёсий бюроси раҳбари Исмоил Ҳаниянинг суиқасди учун Исроилга жавоб қайтармаса, Ғазода оташкесимга эришишга ваъда берган.
31 июль куни Эроннинг янги президенти инаугурациясида иштирок этиш учун Теҳронга келган Исмоил Ҳания Теҳрондаги қароргоҳига ҳужумда ҳалок бўлганди.
Айнан сионистик режим ҳукуматимиз фаолиятининг биринчи кунидаёқ Ҳанияга суиқасд қилиб, уруш қўзғатишга уринди. Баъзи мамлакатларнинг тавсиясига кўра, биз тинчлик ўрнатиш ва бегуноҳ аёллар ҳамда болаларнинг ўлдирилишини тўхтатиш умидида вазминлик кўрсатган бўлсак-да, Исроил аксинча ўз жиноятларини янада кучайтирди.
Агар Исроил ўз хатти-ҳаракатларини қайта кўриб чиқса, ўт очишни тўхтатишга рози бўлса ва минтақадаги эзилган ҳамда бегуноҳ одамларни оммавий қирг”инини тўхтаца, бу бизнинг қасос олишимиз кучи ва турига таъсир кўрсатиши мумкин, деди Эрон президенти.
Айрим манбаларга кўра, Эрон Ироқ ҳудуди орқали Исроилга зарба беришни режалаштирмоқда. Яҳудий давлати мазкур версияга тайёргарлик кўриш мақсадида Ироқдаги “қонуний нишонлар”ни аниқлаган.
Исроилнинг Эронга ҳужуми
26 октябрь кечаси яҳудий давлати армияси Эрондаги ҳарбий объектларга ҳаво ҳужуми уюштирди. Ракета ишлаб чиқариш заводлари ва ҳаво ҳужумидан мудофаа тизимлари нишонга олинди. Эрон томони ҳужум қайтарилгани, бироқ “чекланган зарар” етказилганини билдирди. Тўрт нафар ҳарбий хизматчи ҳалок бўлди. Ҳужум муносабати билан Эрон Бирлашган Миллатлар Ташкилоти Хавфсизлик кенгашининг фавқулодда йиғилишини ўтказишга чақирди.
АҚШ мудофаа вазири Ллойд Остин Эрон “хато” қилмаслигига ва вазиятни янада кескинлаштирмаслигига умид билдирди ҳамда Исроил зарбалари ўзаро ҳужумларга чек қўйганини таъкидлади.
Изоҳ (0)