Бугун, 21 август куни Хитойнинг сунъий интеллект стартапи DeepSeek ўзининг флагман модели V3 нинг янгиланган версиясини чиқарди. Модель Хитой чипларига оптималлаштирилган ва юқори тезликда ишлаш имконини беради. Бу ҳақда Reuters агентлиги хабар берди.
Компаниянинг WeChat’даги хабарида айтилишича, янги DeepSeek-V3.1 модели UE8М0 FP8 аниқлик форматига эга бўлиб, у тез орада чиқарилиши кутилаётган янги авлод маҳаллий чиплар билан ишлаш учун ишлаб чиқилган. DeepSeek бу мослик функцияси қайси чип моделлари ёки ишлаб чиқарувчиларини қўллаб-қувватлашини аниқламаган.
Қайд этилишича, бу DeepSeek моделининг сўнгги ойлар ичида учинчи янгиланиши бўлди. Май ойида Р1 модели янгиланган, март ойида эса V3 такомиллаштирилганди.
Маҳаллий чиплар билан мосликка эътибор қаратилиши DeepSeek ўзининг сунъий интеллект моделларини Хитойнинг тобора ривожланиб бораётган яримўтказгич экотизимига мослаштираётганидан далолат беради. Чунки Пекин Вашингтоннинг экспорт чекловлари фонида Америка технологияларига муқобил ишлаб чиқишни кучайтирмоқда.
Изоҳ (0)