Исроил раҳбарияти Эронга қарши “уруш бошлади”, Эрон Ислом Республикаси эса уни жазоланмасдан қолдиришга йўл қўймайди. Бу ҳақда Эрон Олий раҳбари Оятуллоҳ Али Хоманаий маълум қилди, дея хабар бермоқда Tasnim News Agency.
Маълум қилинишича, 13 июндаги ҳужумлардан сўнг Эрон Исроилга қарши операция эълон қилди. У “Ҳақиқий ваъда 3” деб номланди.
Эрон Олий раҳбари Али Хоманаий ИРИБ давлат телевидениеси орқали мурожаат йўллади. У ўз мурожаатида Исроилнинг Эрон ҳарбий ва ядровий объектларига ҳужумини назарда тутиб, “сионистик режим катта хато ва ақлсизларча иш қилганини” билдирди. Шунингдек, у Исроилнинг Эронга берган зарбаларини “уруш эълони” деб атаган.
“Ҳамма Исроилга қарши куч ишлатиш керак деб ҳисоблайди. Куч ишлатиш. Ва куч ишлатилади... Улар зарба бериб, иш шу билан тугайди деб ўйлашмасин. Улар буни бошлашди. Урушни улар бошлашди. Биз уларнинг ўша ёвузлигидан кейин омон қолишига йўл қўймаймиз”, деди Али Хоманаий.
Шунингдек, Эрон Олий раҳбари қуролли кучлар куч ишлатиш билан ҳаракат қилишини ва муносиб бўлмаган сионистик режимни бахтсиз аҳволга солишини, бундан кейин зарар кўрмасдан қолишига йўл қўйилмаслигини айтган.
13 июнь куни кечқурун Эрон Исроилга баллистик ракеталар билан оммавий ҳужум уюштирди. Тель-Авив ва Қуддусда портлашлар бўлди. Ушбу ҳужум туфайли етказилган зарар ва жабрланганлар ҳақида аллақачон маълумотлар пайдо бўлди.
Эроннинг Исроилга қарши амалга оширган тўрт босқичли ракета ҳужуми оқибатида 3 киши ҳалок бўлди ва камида 70 киши жароҳат олди.
Изоҳ (0)