Тошкент шаҳар Яшнобод туманида 19 яшар йигит дарахтга осилган ҳолда топилди. Бош прокуратура ҳодиса бўйича “Дарё”га маълумот берди.
Яшнобод тумани прокуратураси томонидан рўйхатга олинган терговга қадар текшириш ҳужжатларига кўра, ҳолат 31 май куни тахминан соат 06:30 ларда Яшнобод тумани, “М.Риёзий” МФЙ, Истиқлол кўчасида содир бўлган.
Мазкур кўчадаги 1-уй олдида жойлашган дарахтда 2006 йилда туғилган Сирдарё вилояти, Оқолтин тумани, “Кўркам диёр” МФЙ, Бахмалсой кўчасида доимий рўйхатда туриб яшаган Ў.Ф.нинг арқонга осилган ҳолдаги мурдаси аниқланган.
Ҳодиса жойи тезкор-тергов гуруҳи томонидан кўздан кечирилган ва суд-тиббий экспертизаси тайинланган. Ҳозирда мазкур ҳолат юзасидан Яшнобод тумани прокуратураси томонидан терговга қадар текшириш ҳаракатлари олиб борилмоқда.
Жонига қасд қилганлар
Тошкент вилоятида 32 ёшли аёл ўзини каналга ташлаб, вафот этганди. Навоийда эса 14 ёшли ўқувчи қиз ўзини осиб вафот этгани ҳақида хабар берилганди.
Самарқанд шаҳрида 19 ёшли қиз ўзини 9-қаватдан ташлаб жонига қасд қилгани ҳақида хабар берилган эди. Ҳозирда марҳуманинг барча оила аъзолари терговга жалб қилинган. Онаси марҳума бир қўнғироқдан сўнг бирданига ўзини ташлаб юборганини билдирган.
Шунингдек, 2025 йил январида Қўқондаги талабалар турар жойида талаба қиз ўз жонига қасд қилгани ҳақида хабар берилган эди. Прокуратура суриштирув натижаларига кўра, мазкур ҳолат шахсий муаммолар сабабли содир бўлгани аниқланган ва жиноят иши қўзғатиш рад этилган.
Яна бир ҳолатда Тошкентдаги хонадонлардан бирида фуқаро ошхонада газ плитасини ёқиш орқали ўз жонига қасд қилишга уринган. Натижада газ ҳаво аралашмаси чақнаши содир бўлиб ёнғин келиб чиққандан сўнг ушбу фуқаро 9-қаватдан ўзини ташлаш орқали ҳалок бўлгани аниқланган.
Изоҳ (0)