Мексика президенти Клаудия Шейнбаум АҚШ ҳарбийларининг мамлакат ҳудудига киритилмаслигини айтди. Бу ҳақда BBC хабар берди.
Тегишли баёнот АҚШ президенти Дональд Трампнинг наркокартелларга қарши ҳарбий куч ишлатиш режасига жавобан эълон қилинган. Шейнбаум Вашингтон ва Мексика ўртасида фақатгина ҳамкорлик бўлишини таъкидлаган.
“Қўшма Штатлар ҳарбийлари Мексикага киритилмайди. Биз ҳамкорлик қилишимиз мумкин, аммо босқинчилик бўлмайди. Бундай бўлиши мумкин эмас, мутлақо мумкин эмас”, деган Мексика раҳбари.
Картел — бу бирор маҳсулотни (бу контекстда — гиёҳванд моддаларни) назорат қилиш ва бозорда устунликни қўлга киритиш мақсадида бирлашган йирик гуруҳ ёки ташкилот. Улар асосан Лотин Америкаси (айниқса, Мексика, Колумбия)да фаолият юритувчи, гиёҳванд моддаларни ишлаб чиқариш, контрабанда қилиш ва сотиш билан шуғулланувчи уюшган жиноятчилик тузилмаларидир.
New York Times хабарига кўра, Трамп Пентагонга Лотин Америкасидаги наркокартелларга қарши операцияга тайёрланиш учун махфий фармойиш берган. АҚШ 2025 йил бошида 8 та картел (6 таси мексикалик)ни террористик ташкилот деб эълон қилгани бунга асос бўлгани айтилмоқда. Шейнбаумнинг айтишича, унга Мексикага АҚШ ҳарбийларининг кириши ҳақида ҳеч қандай маълумот берилмаган.
“Бу ҳеч қандай келишувнинг бир қисми эмас, ундан йироқ. АҚШ суверенитетимизга тажовуз қила олмайди. Бу ҳақда гап кетганда, биз ҳар доим ‘йўқ’ деганмиз”, деди Мексика раҳбари.
Бу орада, АҚШ давлат котиби Марко Рубио картелларни қуролланган террористик гуруҳлар сифатида кўриб, уларга қарши разведка ва Мудофаа вазирлиги орқали чоралар кўриш зарурлигини таъкидламоқда.
Сўнгги ойларда Мексика ва АҚШ гиёҳванд моддалар ва ноқонуний миграцияни камайтириш борасида ҳамкорликни кучайтириб келмоқда. Икки давлат чегарасида июнь ойида ноқонуний кесиб ўтиш ҳолатлари рекорд даражада камайган. АҚШнинг Мексикадаги элчиси Роналд Жонсон чегарада фентанил мусодаралари 2 баравардан кўпроққа камайганини очиқлаб, бу ҳамкорлик туфайли картеллар “банкрот бўлаётгани”ни билдирган.
Изоҳ (0)