Самарқандда 18 ёш қиз мактабга келиб, ўқувчи қизларни “самосуд” қилгани ҳақида хабар берилганди. “Замон” дастурида ҳодиса сабаби маълум қилинди.
Мактаб директорининг сўзларига кўра, қизлар ўртасидаги низога ижтимоий тармоқлар изоҳидаги ҳақоратли сўзлар сабаб бўлган.
“Тахминан 2007—2008 йилги қизлар бўлиши керак. 3 нафар қиз ўзини блогер эканини айтиб кириб келди. Сабабини сўраганимда ўқувчи қизим жонли эфирда уларни сўккани айтилди. Шу сабабдан унга жазо қўллаш учун излаб келишибди”, дейди директор.
Шунингдек, ҳолат юзасидан жабрланувчи қизнинг отаси ҳам муносабат билдирди. Унинг таъкидлашича, ҳодисадан қизи тушкунликка тушиб қолган.
Воқеа ҳақида батафсил
Ҳолат 2025 йил 29 апрель куни юз берган бўлиб, Паст Дарғом тумани “Қўшқудуқ” маҳалласи ҳудудида ҳамда туманнинг 83-сонли умумтаълим мактабида фуқаро Э.Б. (2007 йилда туғилган аёл) мазкур мактабнинг 11-синф ўқувчилари У.Х ва Ж.Б.ларни (2009 йилда туғилган қизлар) уриб, тан жароҳати етказган.
Мазкур ҳолат бўйича Паст Дарғом тумани ИИБ ҳузуридаги Тергов бўлими томонидан Самарқанд шаҳрида яшовчи фуқаро Э.Б.га нисбатан Жиноят кодексининг 277-моддаси (безорилик) 3-қисми билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда.
Самарқанд вилоятида ўқувчи қизларнинг “самосуд” қилиниши ҳолатлари бундан аввал ҳам кузатилган.
Хусусан, Паст Дарғом туманидаги мактаб ўқувчиси 30 ёшли эркак томонидан “самосуд” қилинган. Бундан ташқари, Пайариқ туманидаги 58-умумий ўрта таълим мактабида ўқувчи қиз синфдоши томонидан “самосуд” қилинган.
Булунғур туманида эса иккита мактабнинг ўқувчи қизлари ўзаро муштлашишган эди.
Иштихон туманида эса 10-синф қиз йигит талашиб ўзидан уч ёш кичик қизни калтаклаган эди.
Изоҳ (0)