Польшалик актриса Барбара Брилска томошабинларнинг севимли актрисасига айланиб улгургани айни ҳақиқат. Ҳозирда актриса 80 ёшни қаршилаган: унинг ҳаёти ёрқин, унутилмас воқеаларга бой бўлган, аммо шунга қарамай, умидсизлик ва йўқотишларсиз кечмаган.
Актриса Барбара Брилска ҳали ҳам жуда жозибали. Унинг 15 ёшида биринчи ролини ижро этганидан ажабланмаса ҳам бўлади. Ўшанда режиссёр Антони Бохдзевич уни “Бахт ковушлари” картинасига таклиф қилди. Шундан кейин Барбара кинода рол ижро этишни орзу қила бошлади ва охир-оқибат актриса бўлди. У 1965 йилда 24 ёшида “Фиравн” фильмидаги роли билан ватани Польшада машҳурликка эришди.
Омадсиз биринчи никоҳ
Машҳурлиги орқасидан кўплаб мухлисларга эга бўлган бир пайтда Барбара турмуш қуришга қарор қилди. Актриса 20 ёшида математик Ян Боровец билан оила қурди. Аммо бу никоҳ бахтли якун топмади.
Хотинбоз
Биринчи никоҳида омадсизликка учраган Барбара атрофидаги эркакларга разм сола бошлади. Ўша пайтда, актриса таъкидлаганидек, у энг яхшисини танлаши мумкин эди.
Шундай қилиб, унинг ҳаётида келишган актёр Ежи Зелник пайдо бўлди. Жуфтлик чиндан ҳам бир-бирига жуда мос эди. Шундай эканига қарамай, уларнинг севги ҳикояси қисқа бўлди.
Бу Барбаранинг ҳаётида бу энг тез никоҳ ва ажралиш эди. Ежи барча аёлларга юрагидан жой берувчи хотинбоз бўлиб чиқди. Оилали бўлишига қарамай, бундай ҳаётдан воз кечишни хоҳламади. Табиийки, актриса бундай муносабатга тоқат қилолмасди ва эрини тарк этди. Ушбу никоҳ бир йилга ҳам бормади.
Бир умрлик севги
1969 йилда “Оқ бўрилар” фильмининг суратга олиш жараёнида Барбара яна ишқий муносабатларга киришиб кетди. Бу сафар югославиялик актёр Слободан Дмитриевич унинг аёллик жозибаси олдида таслим бўлди. Актриса ҳалигача уни ҳаётидаги чинакам севги деб атайди. Ҳақиқатан ҳам агар актёрнинг онаси эр-хотиннинг ишларига аралашмаганида, бу бахтли якунланган никоҳ бўлиши мумкин эди.
Она ўғлининг яхшигина давлатга эга бўлган бой келинга уйлантиришини орзу қилган ва у бу муносабатларни бузиш учун қўлидан келган ҳамма нарсани қилди. Слободаннинг онаси энг оддий (аммо қабиҳона) йўлдан борди: у Барбарадан келган хатларни яшира бошлади ва ўғлига енгилтабиат актриса уни аллақачон унутиб юборганлигини қайта-қайта айтишдан чарчамади. Ва ниҳоят севишганлар ўртасидаги муносабатлар бузилди. Орадан вақт ўтгач, Дмитриевич янги оила қурди, бу эса Брилсканинг чуқур депрессияга тушишига сабаб бўлди.
“Тақдир ҳазили”
Кўпчиликда бўлганидек, актриса қалб яраларини меҳнат билан даволади, аламини ишидан олди. 1972 йилда очиқ саҳналарга бой бўлган “Севги анатомияси” фильми экран юзига чиқди, Барбара ушбу фильмдаги ролга қўрқмасдан рози бўлди. Фильм намойишидан сўнг танқидчилар актриса карьерасининг қулашини тахмин қила бошлади. Аммо улар адашган эди — айни шу пайтда Элдар Рязанов актрисанинг истеъдодига эътибор қаратди ва унга “Тақдир ҳазили ёки қушдек енгил бўлинг” фильмидаги бош ролни таклиф қилди. Ҳатто Барбаранинг полякча талаффузи ҳам режиссёрни бу қароридан тўхтата олмади.
Брилсканинг ўзига ҳам зиёли рус тили ўқитувчиси ролини ўйнаш ғояси жуда ёқди. 1975 йилда фильм экранларга чиқиши билан Брилска машҳур бўлиб кетди. Мазкур фильмдаги роли учун актриса кўплаб мукофотларга сазовор бўлди, аммо юқори доираларда у бунга лойиқ эмаслиги ҳақида гап-сўзлар кўпайди. Бу ҳам етмагандек, фильмда Алла Пугачёва овози билан қўшиқ куйлаган Барбаранинг хонанда билан муносабатлари ёмонлашди. Ўтган хафагарчиликларни унутиш ва дўстлашиш учун иккисига ҳам йиллар керак бўлди.
Сўнгги уриниш
70 йилларнинг бошларида Барбара яна севиб қолди ва кўп ўтмай турмушга чиқди. Унинг бу сафарги танлагани гинеколог Людвиг Космал эди. Бу никоҳ 18 йил давом этди, лекин Брилскага икки фарзанд ва чексиз оғриқдан бошқа ҳеч нарса бермади.
1973 йилда актриса қизли бўлди, унга Барбара (эркалатиб — Бася) деб исм қўйди. Тўққиз йилдан сўнг у кутилмаганда яна ҳомиладор бўлди. Шундай қилиб, 1982 йилда ўғли туғилди, уни отасининг исми билан Людвиг деб аташди.
Айнан болалари учун ҳам Барбара эрининг хиёнатига кўз юмди, уни ташлаб кетмади. Бу вақтга келиб бир пайтлар уни руҳий тушкунликдан олиб чиққан, муваффақиятларидан фахрланган одамдан асар ҳам қолмаганди. Людвиг ҳасадгўй, қўпол, шафқатсиз бўлиб қолди.
“У менга нолойиқ эди. У бутун кучим ва севгимдан фойдаланди, пул ҳақида-ку айтмаса ҳам бўлаверади. У бир ойда топган пулни мен бир кунда топардим. Бундан ташқари, у ичарди ва ҳали ҳам ичади”, деб тан олади Брилска.
Космалнинг ўзи эса машҳур хотини ҳақида шундай дейди: “Мен хотинимдан нафратланаман, чунки уни ўзим юрган бошқа аёллар билан ҳар гал солиштираман ва у ҳар доим ютиб чиқади”.
Ниҳоят актриса бу ҳолатга чидай олмади: 18 йиллик турмушидан кейин эрини ташлаб кетди, бундай муносабатларга лойиқ эмаслигини тушуниб етди.
Энди қандай яшайман?
Барбаранинг ҳаётидаги мудҳиш фожиа 1993 йил 15 майда содир бўлди. Ўшанда унинг 20 ёшли қизи Бася автоҳалокат туфайли вафот этди — у онаси сингари интилувчан, жуда истеъдодли актриса ва модел эди.
Ўша куни Бася йигити Савелий Жулавский билан машинада кетаётган бўлган. Йигит машина бошқарувини йўқотиб, жиддий бахтсиз ҳодисанинг айбдорига айланди. Савели омон қолди, аммо Бася тез ёрдам келгунига қадар воқеа жойида вафот этди ...
“Унинг ҳайдовчилик гувоҳномасини олганига эндигина олти ой бўлганди. Бу фожиа унинг айби билан содир бўлди. Савелий менга машина атрофида қандай югургани ва “Бася, ўлма!” деб бақирганини айтиб берди. Ўшанда қизим кўзини икки марта очиб юмган, шундан сўнг қайтиб очмаган”, деб эслайди актриса бу ҳақда гапиришга ўзида куч топа олган вақтда.
1993 йил 15 майдан сўнг Барбаранинг ҳаёти иккига бўлинди: аввал ва кейин. Ҳолат шу даражага бориб етдики, ҳатто у ўз жонига қасд қилмоқчи ҳам бўлди, аммо ўғли туфайли бунга журъат эта олмади. Ўғли унга бу дунёда мавжуд бўлишига ёрдам берди: фақат шу ёлғизгина фарзанди учунгина Брилска эрталаб туришга ва ҳар бир янги кунни яшашга ўзида куч топа олди.
Уч йил давомида у деярли уйидан чиқмади, ҳеч кимни кўришни хоҳламади, фақат тинмай йиғлади. 16 йил ўтгачгина ниҳоят ўзига келди ва ҳаётдан завқлана бошлади. Ҳозирда актрисанинг икки нафар ажойиб набираси бор.
Бир ҳафтадан ортиқ вақтни режалаштирманг
Бугунги кунда актриса Польшада — ўзи дизайни устида ишлаган уйида яшайди. Ўғли ҳам оиласи билан унга яқин жойда, лекин уни Барбара ўзи истаганидек тез-тез кўролмайди. Брилсканинг таъкидлашича, қизи вафотидан кейин у ҳозирги кун билан яшашга ва бир ҳафтадан ортиқ вақтга режа тузмасликка ҳаракат қилади. Шунингдек, актриса 100 ёшга кириб вафот этган онаси каби узоқ умр кўришни хоҳламайди. Бу 2018 йилда содир бўлганди: ўшанда актрисанинг собиқ эри ва болаларининг отаси Людвиг Космал ҳам вафот этганди.
“Мен яшашни хоҳламайман, кучим етмайди. Мен ҳар доим жуда ҳаёцевар бўлганман. Ҳозир ҳам нимадир қилишни хоҳлайман, лекин бунга қувватим йўқ. Юз йилгача яшайдиган актёрлар бор, лекин мен буни хоҳламайман. Бундан тушкунликка тушмайман ҳам”, дейди актриса.
Изоҳ (0)