Бугун истеъдодли актриса ва модел Неслиҳан Атагул 31 ёшни қарши олди. Турк сериаллари юлдузининг туғилган куни муносабати билан унинг фильмографияси ҳақида маълумот беришни лозим топдик. Қуйида Неслиҳан Атагул ижросидаги энг қизиқарли фильм ва сериаллар сюжети билан танишиб чиқамиз.
“Хазонрезги” (2006-2010)
Жанр: драма
Режиссёр: Месуде Эрарслан
Сценарий муаллифлар: Мелек Генчўғлу, Эже Ёренч, Рашод Нури Гунтекин
Ролларда: Ҳалил Эргун, Гувен Ҳокна, Бенну Йилдиример, Гокче Баҳадир, Фаҳрие Эвжен, Неслиҳан Атагул ва бошқалар.
Ёш Неслиҳан ўзининг биринчи жиддий ролини “Хазонрезги” сериалида ижро этди. Ундаги ҳикоялар Рашод Нури Гунтекин асари асосида яратилган. Сюжетда кўп фарзандли эр-хотин ҳақида ҳикоя қилинади. Али Ризо ва унинг рафиқаси Хайрия кичик шаҳарчада яшайди ва беш нафар фарзандини қаттиққўллик билан тарбиялайди. Кунларнинг бирида оила Истанбулга кўчиб ўтишга қарор қилади, эр-хотин қизининг катта шаҳарда ўқишини давом эттиришини истайди. Шаҳардаги ҳаёт тарзи уларга кўплаб кутилмаган ҳодисалар ва жиддий қийинчиликларни келтириб чиқаради.
“Ишқ соҳиллари” (2013-2014)
Жанр: драма, мелодрама
Режиссёр: Садуллоҳ Селен
Сценарий муаллифлари: Ҳайрие Эрсоз, Мурат Эмир Эрен, Раъно Маматлиўғлу ва бошқалар
Ролларда: Кадир Дўғулу, Неслиҳан Атагул, Юнус Эмре Йилдиример, Диляра Озтунч, Седа Туркмен, Итир Эсен ва бошқалар.
Ушбу лойиҳада актриса ҳаётдаги бўлажак турмуш ўртоғи Кадир Дўғулу билан бирга иштирок этган. Сериалда Истанбулнинг қашшоқ ҳудудларидан бири бўлган Фотиҳ тумани акс этади. Неслиҳан ана шу ерда яшайдиган Нериман исмли қиз ролини ўйнайди. Қаҳрамон эрта ёшда онасидан айрилиб, отаси Фаизбей ҳамда холаси Гултер хоним билан бирга яшайди. Уларнинг оиласи камтарона ҳаёт кечиради ва қадимги анъаналарга доимо риоя қилади.
Гўзал Нериманга болаликдаги дўсти ошиқ бўлиб, унга уйланишни орзу қилади, лекин вақт ўтиб уларнинг муносабатлари ёмонлаша бошлайди. Кейинчалик Нериман бошқа йигитни учратади ва ҳаёти ўзгариб кетади. Неслиҳан ушбу сериалда содда, шу билан бирга ҳаётга теран қарайдиган, нимани исташини биладиган қиз ролини ижро қилган.
“Сендан менга қолган” (2015)
Жанр: драма, мелодрама
Режиссёр: Абдулла Ўғуз
Сценарий муаллифи: Левент Казак
Ролларда: Неслиҳан Атагул, Экин Коч, Зейнеп Канконде, Тайфун Сав, Дога Конакўғлу, Дила Пекдемир ва бошқалар.
Элиф ва Ўзгур оддий қишлоқда туғилиб ўсади ва болалигида бир-бирига кўнгил қўяди, аммо бир куни Ўзгур Истанбулга кетишга мажбур бўлади. У Элифга ўн кундан кейин қайтиб келишга ваъда берди. Аммо у қарийб ўн йил ўтганидан кейингина қайтади.
Бу вақт ичида йигит Истанбулда яшаб улғаяди ва бойиб кетади: унинг чиройли уйи, машиналари бўлади. Аммо тақдир тақозоси билан Ўзгур болаликдаги биринчи муҳаббатини қайта учратади...
“Севги изтироби” (2015-2017)
Жанр: мелодрама
Режиссёрлар: Ҳилол Сарал, Экин Пандир
Муаллифлар: Анил Эке, Буржу Гўргун Топташ, Ўзлем Йилмаз
Ролларда: Бурак Ўзчивит, Неслиҳан Атагул, Каан Урганжиўғлу, Куршат Алниажик, Орхан Гунер, Неше Байкент ва бошқалар.
“Эмми” мукофотига лойиқ деб топилган мазкур сериал миллионлаб мухлислар қалбидан жой олишга муваффақ бўлган. Неслиҳан мазкур сериалда рассом қиз Ниҳон ролини ўйнаган. Бой ва кибор оиланинг фарзанди автобусда оддий ва содда йигит Камол билан танишиб қолади, воқеалар ривожи шундан кейин бошланади. Неслиҳан гавдалантирган образ оиласи, хусусан, укасини деб уни телбаларча севадиган, аммо ўзининг заррача кўнгли бўлмаган Амирга турмушга чиқишга ва 60 қисм давомида азият чекишига тўғри келади. Неслиҳан ушбу сериалда севгисига содиқ, шу билан бирга укасини деб севгисини қурбон қиладиган қиз ролини ижро қилган.
“Туб” (2018)
Жанр: драма, детектив, саргузашт
Режиссёрлар: Чагатай Тосун, Уйгар Кутлу
Муаллифлар: Башар Башаран, Эмре Оздур
Ролларда: Илкер Калели, Неслиҳан Атагул, Беррак Тузунатач, Булент Ярар, Дефне Каялар, Гёзде Туркпенче ва бошқалар.
Саҳир ўз жонига қасд қилишга мойиллиги бор одамлар билан ишлайди, унинг вазифаси фалокатларни олдини олишдан иборат. Фаолияти давомида у хакер қиз билан танишади ва ушбу учрашув унинг иши ва ҳаёти бутунлай ўзгариб кетишига сабабчи бўлади. Актриса компьютер даҳоси Билге ролини ўйнайди ва сюжетга кўра ҳар қандай паролни буза оладиган моҳир IT мутахассиси бўлади.
Мини сериалдаги ҳикоялар Билге томонидан Саҳир исмли одамни қутқарган пайтдан бошланади. Неслиҳан ушбу сериалда бошқа роллари сингари романтик қиз қаҳрамонини жонлантирмаган. Мухлислар “Туб”ни томоша қилиш орқали актрисанинг янги қирраларини ўзлари учун кашф қилишади.
“Элчининг қизи” (2019-2021)
Жанр: жангари, драма, мелодрама, криминал
Режиссёр: Эмре Кабакушак
Сценарий муаллифлари: Озан Аксунгур, Эйлем Чанпўлат ва бошқалар
Ролларда: Энгин Акюрек, Неслиҳан Атагул, Гонжа Чиласун, Догукан Пўлат, Эдип Тепели ва бошқалар.
“Элчининг қизи”да севги учбурчаги ва кескин бурилишларни учратиш мумкин. Сериал марказида бир-бирига кўнгил қўйган икки ёш туради. Санжар ва Наре бирга бўлиш учун барча нарсага тайёр туради, аммо қизнинг отаси бу муносабатларга қарши. Жуфтлик яширинча турмуш қуриш учун қочиб кетади. Бироқ уларнинг биринчи никоҳ кечасида жиддий низо келиб чиқади ва Санжар Нарени ҳайдаб юборади, шундан кейин қиз ғойиб бўлади.
Йигит тушкунликка тушади. У севгилининг хиёнат қилганлигига ва бошқанинг олдига кетганига ишонади. Аслида эса бари аксинча эди: энг яхши кўрган инсони унга ишонч билдирмаганига дош беролмай, Наре ўз жонига қасд қилишга қарор қилади, лекин омон қолади. Орадан 9 йил ўтиб Санжар бошқа қизга уйланишга тайёргарлик кўраётган вақтда унинг ҳаётида ўтмишдаги муҳаббат яна пайдо бўлади.
“Оҳ, Белинда” (2023)
Жанр: фантастика, драма, комедия
Режиссёр: Дениз Ёрулмазер
Сценарий муаллифи: Ҳакан Бономо
Ролларда: Неслиҳан Атагул, Серкан Чайўғлу, Нежип Мемили, Мерал Четинкая, Берил Позам ва бошқалар.
Драма ва комедия жанридаги “Оҳ, Белинда” сериали 2023 йилнинг 7 апрель санасида томошабинларга тақдим этилган. Диляра — ёш актриса бўлади, у Белинда шампунининг реклама ролигини суратга олишга рози бўлгач, ҳамма нарса ўзгариб кетади. Актриса икки фарзанди бор уй бекаси ролини ижро этади ва тўсатдан қаҳрамон ўзини бошқа дунёда топади, бу ерда актриса реклама қаҳрамонининг ҳаётини бошдан кечиради, яъни ҳаётидан жуда нафратланган уй бекасининг барча ташвишлари унга тушади. Фильм комедия ва фантастик жанрда суратга олинган.
Изоҳ (0)