Франциянинг “ПСЖ” клуби УЕФА Чемпионлар Лигаси финалида эришган ғалабани нишонлаш чоғида содир бўлган тартибсизликларда икки киши ҳалок бўлди. Бу ҳақда TF1 Info хабар берди.
Маълум қилинишича, тартибсизлар оқибатида 192 киши жароҳат олган. Дакс коммунасида (Ланда департаменти) 17 ёшли йигит кўкрак қафасига пичоқ урилиши оқибатида ҳалок бўлган. Гумонланувчи қидирувга берилган.
Парижнинг 15-округида эса “ПСЖ“ фанатлари бошқарувидаги автомобиль скутерни уриб юборган, ҳайдовчи ҳалок бўлган. Автомобиль воқеа жойини тарк этган. Франция пойтахтида 559 киши, жумладан 491 нафар вояга етмаганлар қўлга олинган.
Шунингдек, 320 киши ҳибсга олинган, улардан 254 нафари Парижда ушланган. Ички хавфсизлик органларининг 22 нафар ходими яраланган. 7 нафар ўт ўчирувчида тан жароҳатлари қайд этилган. Тартибсизликлар чоғида 692 та ёнғин қайд этилган, 264 та ёнғинда автомобилларга зарар етган.
“ПСЖ”нинг УЕФА Чемпионлар Лигасидаги йирик ғалабаси
31 май куни “ПСЖ” Европа Чемпионлар Лигаси финалида Италиянинг “Интер” клубини йирик 5:0 ҳисобида мағлуб этди. Еврокубоклар мавсумининг асосий ўйини “Арена Мюнхен”да бўлиб ўтди.
“ПСЖ” илк бор Европа Чемпионлар Лигаси кубогини қўлга киритди. Бунгача ушбу нуфузли совринни фақатгина бир француз клуби — “Марсель” 1993 йилда олганди. Ўша ғалаба ҳам Мюнхендаги стадионда қўлга киритилганди.
Францияда 2024/25 йилги Чемпионлар Лигаси финалидан кейин тартибсизликлар авж олди. Мамлакат пойтахтида 5 400 нафар полиция ва жандармерия ходимлари сафарбар қилинди. Ҳуқуқ-тартибот идоралари маълумотларига кўра, бир неча киши Елисей майдонидаги пойабзал дўконига бостириб кириб, уни талон-тарож қилган.
Гренобл марказида автомобиль уриб кетиши оқибатида камида тўрт киши жароҳатланган. Автомобиль ҳайдовчиси трамвай йўлида катта тезликда ҳаракатланган. AFP агентлиги маълумотларига кўра, у полицияга таслим бўлган ва ҳибсда қолмоқда.
Изоҳ (0)