Португалиялик ҳужумчи Криштиану Роналду келажаги борасида қарор қабул қилди. Foot Mercato журналисти Санти Аунанинг хабар беришича, Роналду “Ан-Насср” клубида қолади. Томонлар аллақачон келишувга эришгани ва бу борада ҳеч қандай шубҳа йўқлиги таъкидланмоқда.
Маълум қилинишича, Роналду Саудия Арабистони Суверен жамғармасидан рақобатбардош жамоа шакллантириш бўйича барча зарур кафолатларни олган. Бу нафақат унинг шахсий манфаатлари учун, балки клубнинг келажаги учун ҳам муҳимдир. Бундан ташқари, Криштиану “Ан-Насср”нинг трансфер сиёсатида фаол иштирок этади ва айрим қарорларни қабул қилишда ўз фикрини билдиради.
“Ан-Насср”га яқинда янги спорт директори келиши кутилмоқда. Клуб камида битта марказий ҳимоячи, битта таянч ярим ҳимоячи ва битта чап қанот ҳужумчисини трансфер қилишни режалаштирмоқда.
Маълумот учун, жорий мавсум “Ан-Насср” Саудия Про Лигасида 70 очко тўплаб, турнир жадвалининг учинчи поғонасидан жой олди. Улар чемпионликни қўлга киритган “Ал-Иттиҳод”дан 13 очко ортда қолди. 40 ёшли Роналду эса мусобақанинг энг яхши тўпурарига айланган — 25 та гол. Унинг клуб билан шартномаси 2025 йил июнь охиригача мўлжалланган.
Изоҳ (0)