Хорватиялик ярим ҳимоячиси Лука Модрич Криштиану Роналду ёки Лионель Месси ўйнаётган клублардан бирига қўшилиши мумкин. Бу ҳақда Footmercato нашри хабар берди.
Манбага кўра, Модрич 2025 йилда бўлиб ўтадиган Клублар ўртасидаги Жаҳон чемпионатидан сўнг “Реал Мадрид”ни эркин агент сифатида тарк этади. Унга Саудия Арабистонининг “Ан-Насср” клуби ҳамда АҚШнинг “Интер Майами” жамоасидан таклифлар тушган. Бундан ташқари, “Ал-Иттифоқ” (Саудия Арабистони) ҳамда бир нечта бразилиялик клублар ҳам Модричга қизиқиш билдирмоқда.
Таъкидланишича, Модрич узоқ вақт давомида “Ан-Насср” билан музокара ўтказиб келган. Бу орқали у собиқ жамоадоши Криштиану Роналду билан яна бир жамоада тўп суриши мумкин. Бироқ футболчининг оиласи АҚШга кўчиб ўтишни маъқул кўраётгани сабабли, “Интер Майами” варианти ҳам ҳақиқатга яқин ҳисобланади.
Модрич 2012 йилдан бери “Реал Мадрид” сафида ўйнаб келмоқда. У “қироллик клуби” билан 28 та соврин қўлга киритди, жумладан, 6 марта УЕФА Чемпионлар Лигасида ғолиб бўлди. Модрич “Реал” таркибида 590 ўйинда майдонга тушиб, ўз ҳисобига 43 та гол ва 95 та голли узатма ёздириб қўйган.
Изоҳ (0)