“Ан-Насср”нинг Осиё Чемпионлар Лигаси ярим финалидаги мағлубияти ортидан Криштиану Роналдунинг келажаги яна эътибор марказида бўлиб турибди. Португалия матбуотининг хабарига кўра, 40 ёшли ҳужумчи фаолиятини бошлаган клуб — “Спортинг”га қайтиш ҳақида ўйламоқда.
Бу янгилик Лиссабон клуби ҳужумчиси Виктор Гёкерешнинг бошқа клубга ўтиши ҳақидаги миш-мишлар фонида тарқалди.
Роналдунинг асосий мақсади — 2026 йилги мундиалга яхши спорт формасида бориш. “Спортинг” раҳбарияти ҳам Роналдунинг қайтиши ҳақидаги хабарларга ижобий фикр билдирган. Бу клуб учун тижорий жиҳатдан анча фойдали бўлиши мумкин.
Роналдунинг кетиш қарори “Ан-Насср”нинг ёмон ўтказаётган мавсуми сабаб қабул қилингани айтилмоқда. Клуб Осиё Чемпионлар Лигаси ярим финалида “Кавасаки Фронтале”га 2:3 ҳисобида мағлуб бўлиб, финал йўлланмасидан маҳрум бўлди. Ҳимоядаги хатолар ва ўтказиб юборилган голлар жамоага қимматга тушди. Бундан ташқари, “Ан-Насср” Саудия Қирол кубогидан ҳам эрта чиқиб кетди. Шунингдек, Про Лига турнир жадвалида “Ал-Иттиҳод”дан 8 очко ортда қолган ҳолда 3-ўринда бормоқда.
Роналду жорий мавсум 33 та гол ва 4 та ассист муаллифига айланган. Унинг клуб билан шартномаси 2025 йилнинг июнь ойи охиригача амал қилади. Transfermarkt портали ҳужумчининг қийматини 12 миллион еврога баҳолаган.
Изоҳ (0)