Килиан Мбаппе 2024/25 йилги мавсум “Олтин бутса”сига сазовор бўлди. “Реал Мадрид” ҳужумчиси Испания чемпионатидаги илк мавсумиданоқ 31 та гол уриб, Европанинг энг сермаҳсул футболчиси сифатида тан олинди.
Гарчи “Спортинг” клуби ҳужумчиси Виктор Дёкереш мавсум давомида 39 та гол урган бўлса-да, Португалия чемпионатининг савияси Испания Ла Лигасидан пастроқ экани сабабли, у рейтингда Килиан Мбаппедан кейинги ўринни эгаллади. Таққослаш учун, Ла Лигада ҳар бир гол учун 2 балл коэффициэнт ҳисобланади, Португалия Премейрасида эса ҳар бир гол учун 1,5 балл билан баҳоланади.
Шунингдек, Мбаппе бир қанча натижаларни ҳам янгилади. Хусусан, у 2004/05 йилги мавсумдан буён “Олтин бутса”ни қўлга киритган илк француз футболчиси бўлди. Охирги марта Тьерре Анри мазкур совринга эга чиққан эди. Шунингдек, Килиан сўнгги 10 йил ичида ушбу мукофотни қўлга киритган илк “Реал” футболчисига айланди. 2014/15 йилги мавсумда Криштиану Роналду “Олтин бутса”га эга чиққан ва шундан кейин мадридликларнинг ҳеч қайси аъзоси ушбу мукофотни қўлга киритмаган эди.
2024/25 йилги мавсум “Олтин бутса” соврини рейтинги:
1. Килиан Мбаппе (“Реал”) – 31 гол × 2 = 62 очко
2. Виктор Дёкереш (“Спортинг”) – 39 гол × 1,5 = 58,5 очко
3. Муҳаммад Салоҳ (“Ливерпуль”) – 29 гол × 2 = 58 очко
4. Роберт Левандовски (“Барселона”) – 27 гол × 2 = 54 очко
5. Ҳарри Кейн (“Бавария”) – 26 гол × 2 = 52 очко.
Изоҳ (0)