“Ан-Насср” ҳужумчиси Криштиану Роналду ҳали футбол билан хайрлашмоқчи эмас. Бу ҳақда инсайдер Николо Скира хабар бермоқда.
40 ёшли португалиялик юлдузнинг Саудия Арабистонидаги клуб билан тузган шартномаси ёзда якунланади. Шунга қарамай, у яна камида икки мавсум давомида ўйнашни режалаштирган. Айни дамда Роналдуга бир нечта таклифлар тушган ва у яқин кунларда ўз келажаги ҳақида қарор қабул қилади.
Жорий мавсумда Роналду “Ан-Насср” сафида 39 та ўйинда майдонга тушиб, 33 та гол ва 4 та голли узатма амалга оширди.
Шунга қарамай, бир қатор нашрлар хабарига кўра, клуб раҳбарияти ва футболчининг ўзи шартномани узайтириш масаласида бир тўхтамга кела олмаяпти. Бунга сабаб сифатида риёдликларнинг Осиё Чемпионалар Лигаси йўлланмасига эга чиқа олмагани кўрсатилмоқда.
Аввалроқ Роналдуга “Челси”, “Ал-Аҳли”, “Бешиктош”, “Лос-Анжелес” ҳамда “Спортинг” клубларидан таклиф борлиги ҳақида хабарлар тарқалган эди.
Изоҳ (0)