Испаниялик журналист Хосеп Педрерол El Chiringuito телеканали эфирида Мадриднинг “Реал” клуби трансферлари ҳақида батафсил маълумот берди.
Манбага кўра, “Реал” Португалиянинг “Бенфика” клубида тўп сураётган чап қанот ҳимоячиси Альваро Каррерас билан шартнома имзолаган. Мадридликлар футболчини Клублар ўртасидаги Жаҳон чемпионатига олиб кетишни режалаштирмоқда ва шу сабабли “Бенфика”га оз миқдорда товон пули тўлайди.
Мадридликлар бу орқали ҳимоя чизиғидаги муаммоларни бартараф этмоқчи. Якунланган мавсум “қироллик клуби” ҳимоясида бир қатор муаммолар кузатилди. Давид Алаба, Антонио Рюдигер, Ферлан Менди ва Дани Карвахаль жароҳат олганлиги сабабли жамоанинг муҳим учрашувларида майдонга туша олмаган.
Шу боис “Реал” янги мавсум олдидан айнан ушбу чизиқни кучайтиришга ҳаракат қилмоқда. Аввалроқ клуб “Борнмут”дан марказий ҳимоячи Дин Хейсенни харид қилди, шунингдек, “Ливерпуль” сафида тўп сурган ўнг қанот ҳимоячиси Трент Александр-Арнольдни эркин агент сифатида жамоага қўшиб олди. Энди эса чап қанотдаги бўшлиқни тўлдириш устида иш олиб бормоқда. Манбага кўра, Альваро Каррерас бу позиция учун идеал номзод сифатида кўрилмоқда.
22 ёшли Каррерас ўтган мавсумда “Бенфика” таркибида барча мусобақалар доирасида 50 та ўйинда майдонга тушиб, 4 та гол ва 5 та голли узатма муаллифига айланган. Унинг клуб билан шартномаси 2029 йил ёзигача амал қилади. Transfermarkt портали футболчининг қийматини 35 миллион еврога баҳолаган.
Изоҳ (0)