Англиялик ҳимоячи Трент Александр-Арнольд 2025/26 йилги мавсумдан бошлаб “Реал Мадрид” аъзоси ҳисобланади. 26 ёшли футболчи Дани Карвахаль жароҳатидан сўнг муаммога айланган ўнг қанот ҳимояси учун ечим бўлиши кутилмоқда. Данининг йўқлигида Феде Вальверде ва Лукас Васкес каби футболчиларни ўша позицияда ўйнашга мажбур бўлди.
Александр-Арнольднинг келиши билан “Реал”нинг ўнг қанот ҳимоясида иккита яхши формадаги футболчилар пайдо бўлади. Энди мураббий Карвахаль ва “Ливерпуль”дан келган юлдуз ўртасида ротация қилиши мумкин. Бироқ, Александр-Арнольд ўзининг бутун фаолияти давомида кийиб келган машҳур 66-рақамдан фойдаланолмайди.
Ла Лига қоидалари нега бунга рухсат бермайди?
Испания чемпионатининг регламентига кўра, асосий жамоа футболчилари фақат 1 дан 25 гача бўлган рақамларни олиши мумкин. 1, 13 ва 23-рақамлар дарвозабонларга ажратилган бўлиб, қолганлари бошқа позицияда ўйнайдиган футболчиларга ажратилган. Шунга кўра, Александр-Арнольд севимли 66-рақамида Ла Лига ўйнай олмайди.
Нега у айнан 66-рақамни танлаган эди?
Аслида, Александр-Арнольд 66-рақамни ўзи танламаган. “Ливерпуль” клубининг либослар менежери Ли Редклиф бу ҳолатни қуйидагича тушунтиради: “Академиядан асосий жамоага чақирилган ҳар бир футболчига атайлаб юқори рақам берилади, бу орқали улар паст рақам олиш учун ҳаракат қилиши керак. Бироқ Трент 66-рақамга ўрганиб қолди ва уни алмаштиришни хоҳламади.”
Энди у “Реал Мадрид” сафида янги рақам танлаши керак бўлади. Арнольд фаолияти давомида бошқа рақамлар билан ҳам ўйнаган: 2-рақам (ҳозирда Карвахалда), 15 (Арда Гюлер), 17 (Лукас Васкес), 18 (Хесус Вальехо). 17 ва 18-рақамлар ҳозирда бўш. Шунингдек, клубни тарк этаётган Лука Модричнинг 10-рақами кимга берилиши аниқ эмас. ОАВда янги мавсум Килиан Мбаппе хорватиялик футболчининг рақамини олиши ҳақида хабарлар тарқалган. Агар бу ҳолат юз берса, Мбаппенинг 9-рақами Эндрикка ўтиши кутилмоқда. У ҳолда “Реал”да 16-рақам ҳам бўшаши эҳтимоли ҳам бор.
Изоҳ (0)