Мадриднинг “Реал” клуби бош мураббийига айланишга яқин турган Хаби Алонсо икки нафар ҳимоячи билан шартнома имзолашни истамоқда. Бу ҳақда Sport.es нашри хабар берган.
Унга кўра, испаниялик мутахассис Мадрид клуби раҳбариятига ўзининг трансфер борасидаги режалари ҳақида маълумот берган. Алонсо “Борнмут” футболчиси Дин Хейсен ҳамда “Бенфика”нинг чап қанот ҳимоячиси Альваро Каррерасни “қироллик клуби”га олиб келишни истамоқда.
Манбада ёзилишича, “қаймоқранглилар” бу икки футболчининг трансфери учун 100 миллион евродан ортиқ маблағ ажратишга тайёр. “Борнмут” “Реал”дан Дин Хейсеннинг шартномасида кўрсатилган 58 миллион евролик товон пулини тўлашни талаб қилмоқда. Шунингдек, Каррераснинг ҳам “Бенфика” билан шартномасида 50 миллион евро тўлаш шарт, дейилган банд мавжуд. Мадридликлар ушбу суммани тўлашга тайёр, лекин ҳозирча бошқа маълумотлар йўқ.
Жорий мавсум Дин Хейсен Англия Премьер Лигаси ҳамда мамлакат кубоги доирасидаги 34 та ўйинда майдонга тушиб, ўз ҳисобига 3 та гол ва 1 та ассист ёздириб қўйган. Альваро Каррерас эса 48 та ўйинда қатнашиб, 4 та гол ва 5 та голли узатмага муаллифлик қилган.
Изоҳ (0)