Испаниялик журналист Мигел Анхел Диаснинг хабар беришича, Лука Модрич Клублар ўртасидаги Жаҳон чемпионатидан сўнг “Реал Мадрид” билан хайрлашади.
39 ёшли хорватиялик ярим ҳимоячи жамоада қолишни истаган бўлса-да, клуб унга янги шартнома таклиф қилмаган. Тахминларга кўра, Модрич 24 май куни бўладиган “Реал Сосьедад”га қарши баҳсда “Сантяго Бернабеу”даги мухлислар билан хайрлашади.
Таъкидланишича, бу қарор клуб томонидан мустақил равишда қабул қилинган. Жамоага келиши кутилаётган Хаби Алонсо Лукани таркибда кўришни истаганди, бироқ раҳбарият мутахассиснинг фикрини инобатга олмагани айтилмоқда.
Лука Модрич “Реал Мадрид” сафида 13 мавсум ўтказди, бу давр мобайнида 6 марта УЕФА Чемпионлар Лигаси, 4 марта Ла Лига, 2 марта Испания Кубоги ва 1 марта “Олтин тўп” мукофотини қўлга киритган.
Жорий мавсум Модрич асосий таркибдан четда қолган бўлса-да, 56 ўйинда майдонга тушиб, ўз ҳисобига 4 та гол ва 9 та голли узатма ёздириб қўйди.
Шунингдек, Модричнинг клуб билан хайрлашуви куни Карло Анчелотти, Лукас Васкес ва Хесус Вальехо ҳам “Реал”ни тарк этишини расман эълон қилиши кутилмоқда.
Маълумотларга кўра, Модрич ва Васкес Клублар ўртасидаги Жаҳон чемпионатида иштирок этади. Вальехо эса АҚШга бўладиган сафарга олиб кетилмайди.
Изоҳ (0)