“Реал Мадрид”даги фаолиятини якунлаётган хорватиялик футболчи Лука Модрич “Милан” қизиқишлари доирасига тушиб қолди. Журналист Фабрицио Романонинг хабарига кўра, “россонерилар” ёзда у билан шартнома имзолаш ҳақида ўйламоқда.
Миланликларнинг янги спорт директори Игли Таре Модрични жамоанинг марказий чизиғини кучайтириш учун идеал вариант сифатида кўрмоқда. 39 ёшли ярим ҳимоячи “Реал” сафидаги сўнгги турнири сифатида Клублар ўртасидаги Жаҳон чемпионатида иштирок этади, шундан сўнг янги жамоага ўтиши кутилмоқда.
Модричга ҳозирда Саудия Арабистони, АҚШ (MLS) ва бир нечта Европа клублари қизиқиш билдирмоқда. Бироқ Массимилиано Аллегри бошчилигидаги “Милан” унга яхши лойиҳа ва оилавий ҳаёт учун қулай шароит таклиф қилмоқда. Бу эса қарор қабул қилишда муҳим омил бўлиши мумкин.
Ҳозирча музокаралар дастлабки босқичда, аммо Модрич номи “Милан” кийиниш хонасида фаол тарзда муҳокама қилинмоқда. Клуб бу трансфер орқали таркибни кучайтириш билан бирга, ўзининг янги амбицияларини ҳам намойиш қилмоқчи. Охирги қарор Модричнинг ўзига боғлиқ.
Модрич 2012 йилдан бери “Реал Мадрид” сафида ўйнаб келади. У “қироллик клуби” билан 28 та соврин қўлга киритди, жумладан, 6 марта УЕФА Чемпионлар Лигасида ғолиб бўлган. Модрич “Реал” таркибида 590 ўйинда майдонга тушиб, 43 та гол ва 95 та голли узатма ёздириб қўйган.
Изоҳ (0)