Самарқанднинг Булунғур туманида иккита мактабнинг ўқувчи қизлари ўзаро муштлашишди. Ҳолат акс этган видео ижтимоий тармоқларда тарқалди.
Вилоят ИИБ матбуот хизматининг маълум қилишича, ҳолат 25 апрель куни соат 16:30 ларда Булунғур тумани марказида жойлашган “Диёр” спорт мажмуаси майдонида юз берган.
Булунғур туман ХТБга қарашли 22 ва 23-сонли умумтаълим мактабларининг 8-синфида таҳсил олаётган ўқувчи қизларнинг бир-бирларига нисбатан турли ҳақоратли сўзлар айтгани натижасида жанжалли ҳолат юзага келган.
Жанжал туман ИИБ томонидан расмийлаштирилиб, ҳозирда терговга қадар текширув ҳаракатлари олиб борилмоқда.
Хабарда таъкидланишича, текширув якунларига кўра ушбу ҳолат мактабларнинг жамоаси ҳамда ота-оналари иштирокида муҳокама қилиниши белгиланган.
Ўқувчи қизлар жанжали
Бир неча кун олдин Тошкент шаҳри Янгиҳаёт туманида икки қиз бошқа бир қизни “самосуд” қилгани ҳақида хабар берилган эди. Ҳолат юзасидан Жиноят кодексининг 277-моддаси (безорилик) билан жиноят иши қўзғатилган. Шу каби воқеа Тошкентнинг Шайхонтоҳур туманида ҳам юз берди. Тумандаги 82-мактаб 7-синф ўқувчиси тўрт нафар дугонаси билан бирга мазкур мактабнинг 8-синф ўқувчиси бўлган қизни дўппослаган ҳамда тасвирга олинган видеони ўзининг Instagram даги саҳифасига жойлаб тарқатган. Ушбу ҳолат юзасидан ҳам жиноят иши қўзғатилган.
Изоҳ (0)