Samarqandda 18 yosh qiz maktabga kelib, o‘quvchi qizlarni “samosud” qilgani haqida xabar berilgandi. “Zamon” dasturida hodisa sababi ma’lum qilindi.
Maktab direktorining so‘zlariga ko‘ra, qizlar o‘rtasidagi nizoga ijtimoiy tarmoqlar izohidagi haqoratli so‘zlar sabab bo‘lgan.
“Taxminan 2007—2008-yilgi qizlar bo‘lishi kerak. 3 nafar qiz o‘zini bloger ekanini aytib kirib keldi. Sababini so‘raganimda o‘quvchi qizim jonli efirda ularni so‘kkani aytildi. Shu sababdan unga jazo qo‘llash uchun izlab kelishibdi”, deydi direktor.
Shuningdek, holat yuzasidan jabrlanuvchi qizning otasi ham munosabat bildirdi. Uning ta’kidlashicha, hodisadan qizi tushkunlikka tushib qolgan.
Voqea haqida batafsil
Holat 2025-yil 29-aprel kuni yuz bergan bo‘lib, Past Darg‘om tumani “Qo‘shquduq” mahallasi hududida hamda tumanning 83-sonli umumta’lim maktabida fuqaro E.B. (2007-yilda tug‘ilgan ayol) mazkur maktabning 11-sinf o‘quvchilari U.X va J.B.larni (2009-yilda tug‘ilgan qizlar) urib, tan jarohati yetkazgan.
Mazkur holat bo‘yicha Past Darg‘om tumani IIB huzuridagi Tergov bo‘limi tomonidan Samarqand shahrida yashovchi fuqaro E.B.ga nisbatan Jinoyat kodeksining 277-moddasi (bezorilik) 3-qismi bilan jinoyat ishi qo‘zg‘atilgan bo‘lib, hozirda dastlabki tergov harakatlari olib borilmoqda.
Samarqand viloyatida o‘quvchi qizlarning “samosud” qilinishi holatlari bundan avval ham kuzatilgan.
Xususan, Past Darg‘om tumanidagi maktab o‘quvchisi 30 yoshli erkak tomonidan “samosud” qilingan. Bundan tashqari, Payariq tumanidagi 58-umumiy o‘rta taʼlim maktabida o‘quvchi qiz sinfdoshi tomonidan “samosud” qilingan.
Bulung‘ur tumanida esa ikkita maktabning o‘quvchi qizlari o‘zaro mushtlashishgan edi.
Ishtixon tumanida esa 10-sinf qiz yigit talashib o‘zidan uch yosh kichik qizni kaltaklagan edi.
Izoh (0)