Сурхондарё вилоятида аёл бир неча аёллар томонидан аёвсиз “самосуд” қилингани ҳақида хабарлар тарқалди. Вилоят Ички ишлар бошқармаси мазкур хабарларга муносабат билдирди.
Хабарга кўра, бир гуруҳ аёллар қарзини бермагани учун аёлни дўппослаб, қош ва сочларини кесиб, кийимларини йиртиб ташлашгани айтилаётган ҳолат юзасидан суриштирув ишлари олиб борилди. Ҳолат 2022 йилнинг ноябрь ойи охирларида, Денов тумани “Боғишамол” маҳалласи ҳудудида содир бўлган.
Сариосиё туманида яшовчи 1991 йилда туғилган Д.С. Денов туманида яшовчилар 2003 йилда туғилган Р.Г. ва Х.Н. исмли аёллар ўрталарида аввалдан мавжуд бўлган низолари юзасидан, ўзаро жанжаллашиб, Д.С.ни маҳалла ҳудудида уриб тан жароҳати етказган.
Ҳозирги кунда мазкур ҳолат юзасидан, Денов тумани ИИБ ҳузуридаги Тергов бўлими томонидан терговга қадар текширув ҳаракатлари олиб борилмоқда. Терговга қадар текширув ҳаракатлари Сурхондарё вилояти Ички ишлар бошқармаси томонидан назоратга олинган.
“Самосуд” воқеаларидан
Шу каби ҳолат Тошкент шаҳридаги мактабларнинг бирида содир бўлган эди. Ўқувчи қизлар бошқа бир қизни “самосуд” қилган. Воқеага миш-миш ва тухмат сабаб бўлгани айтилмоқда.
Тошкент шаҳри мактабгача ва мактаб таълими бошқармаси ҳам ҳолат юзасидан муносабат билдирган. Маълум бўлишича, мактаб маъмурияти ушбу ҳолатдан 12 апрель куни кечки вақтда хабар топган. 13 апрель куни мактаб маъмурияти жанжал иштирокчиларининг ота-оналарини чақиртириб, улар билан тушунтириш ишларини олиб борган.
Воқеа юзасидан Янгиҳаёт тумани ички ишлар органи фаолиятини мувофиқлаштириш бўлимига мурожаат қилинган. Ушбу ҳолат юзасидан Янгиҳаёт тумани ички ишлар органи фаолиятини мувофиқлаштириш бўлими тергов бўлими томонидан Жиноят кодексининг 277-моддаси (безорилик) билан жиноят иши қўзғатилган. Тергов давом этмоқда.
Изоҳ (0)